DILI, 24 agostu 2023 (TATOLI) – Estudante estajiáriu 400 husi Institutu Superiór Kristal (ISC), husi Universidade Nasionál Timor Lorosa’e (UNTL) no husi Orientál Timor Lorosa’e (UNITAL) sei apoiu Ministériu Edukasaun hodi hatutan Programa Eskola iha Uma iha faze daruak ba alunu sira iha Dili, Ermera, Bobonaro no Baucau.
Diretór Nasionál Edukasaun Pré-Eskolár, Tomás Pereira, afirma ba implementasaun programa ne’e aborda ona iha reuniaun dahuluk ne’ebé mak realiza entre ministériu no universidade sira.
“Ida ne’e foin maka faze dahuluk ita-nian hasoru malu ho parte universidade sira. Programa Eskola iha Uma faze daruak iha munisípiu haat ne’e ita sei husu alin estudante estajiáriu husi universidade sira maka sei bá realiza programa ne’e”, Tomás Pereira reitera iha Vila Verde.
Nia esplika katak programa faze daruak ne’e presiza estudante 400 refere, tanba kada munisípiu sei instala sentru hamutuk 50. Kada sentru sei tau estudante na’in-2 atu reforsa atividade hanorin ba labarik sira.
“Kada munisípiu ne’e ita sei koloka estudante estajiáriu na’in-100 nune’e ba munisípiu haat ho sentru 200”, dehan.
Antes atu hanorin, estajiáriu sira partisipa uluk formasaun intensiva disponibiliza husi Ministériu Edukasaun no Institutu Nasionál Formasaun Dosente no Profisionál Edukasaun (INFORDEPE) nune’e bele hasa’e sira-nian koñesimentu atubele koloka sira tuir nesesidade ne’ebé iha.
Matéria sira ne’ebé maka estajiáriu sira sei hetan iha formasaun ne’e mai husi kurríkulu pré-eskolár nian ne’ebé kompostu husi matéria pedagojia, metodolojia ensinu nomós konteúdu kurrikulár.
Realizasaun Programa Eskola iha Uma ne’e ho nia durasaun 195 oras nia laran. Bainhira kompleta ona oras ne’ebé determina maka atividade ne’e mós remata ona, tanba programa ne’e halo atu prepara labarik sira iha pré-eskolár hodi hakat bá primeiru anu.
Rekorde katak Programa Eskola iha Uma antes ne’e implemena ona iha munisípiu Dili ho sentru hamutuk 37. Tuir planu Ministériu Edukasaun, sei instala tan sentru 13 nune’e bele kompleta númeru ne’ebé determina ona hanesan ho munisípiu tolu ne’ebé mak atu estabelese daudaun ne’e.
Ba realizasaun programa faze daruak ne’e iha munisípiu, parte edukasaun halo ona komunikasaun ho Ministériu Administrasaun Estatál hodi informa ba prezidente autoridade sira, nune’e bainhira Ministériu Edukasaun orienta atu aselera programa ne’e husi parte administradór postu, xefe suku no aldeia sira hetan ona koñesimentu.
Tomás do Rosário informa hahú setembru bá oin servisu instalasaun sentru no prosesu inskrisaun ba estudante sira bele realiza ona.
Reitór ICS, Sebastião Pereira, konsidera Programa Eskola iha Uma faze daruak husi Ministériu Edukasaun ne’e di’ak tebes tanba sei ajuda inan-aman sira atu lalori labarik bá buka eskola dook. “Labarik sira bele eskola iha bairru laran ho maneira hanorin ne’ebé laiha diferensa ho eskola formál sira”, realsa.
Liuhusi kooperasaun ho Ministériu Edukasaun ne’e, parte ISC prontu fó ninia estudante estajiáriu sira ba iha programa ne’e iha tempu saida de’it, importante mak programa ne’e rasik labele prejudika fali estudante sira iha terrenu bainhira iha prosesu implementasaun.
Relembra katak Ministériu Edukasaun, Juventude no Desportu anteriór (MEJD) no Embaixada Nova Zelándia iha Timor-Leste assina, iha novembru 2022, akordu ida ba transferénsia millaun $1,6 ba Programa Eskola iha Uma faze dahuluk ne’ebé implementa iha Dili ho nia totál benefisiáriu liu 600 husi aldeia 81 iha kapitál.
Notísia relevante: MEJD aloka millaun $2-resin ba Programa Eskola iha Uma faze daruak
Jornalista: Tomé Amado
Editora: Maria Auxiliadora
