MAE konsulta Autoridade RAEOA bá progresu ezekusaun PNDS no eleisaun suku
OÉ-CUSSE, 24 agostu 2023 (TATOLI – Vise-Ministru Administrasaun Estatál (MAE), Jacinto Rigoberto, hamutuk ho delegasaun, kinta ne’e konsulta Autoridade Rejiaun Administrativa Espesiál Oé-Cusse Ambeno (RAEOA), kona-bá progresu ezekusaun Programa Nasionál Dezenvolvimentu Suku (PNDS) no preparasaun ba eleisaun suku iha Oé-Cusse Ambeno.
Notísia relevante: Tomas Cabral: “Loron 120 nia laran poder lokál tenke funsiona”
Hafoin enkontru, Vise-Ministru Administrasaun Estatal, Jacinto Rigoberto, senti orgullu, tanba autoridade RAEOA hamutuk ho entidade hotu koopera hodi simu vizita dahuluk hodi membru Governu IX atu relata progresu servisu sira-ne’é implementa iha Oé-Cusse.
“Ha’u simu despaxu hosi Ministru Estatál, atu perkore munisipíu sira hotu, hodi haree ba asuntu rua, ida kona-bá preparasaun eleisaun suku tanba Governu aposta ona data eleisaun sei akontese iha outubru 2023 ne’e, daruak atu monitoriza implementasaun programa PNDS iha munisipíu hotu inklui Oé-Cusse,” nia informa ba jornalista sira iha Gabinete ZEESM, Oé-Cusse.
Reuniaun traballu ne’e, Vise Ministru Administrasaun Estatal, rekomenda pontu prinsipál rua, ba Autoridade kona-bá eleisaun suku, persiza kaer metin lei eleisaun suku, ne’ebé maka parlamentu aprova tiha ona hodi hili xefe suku sira.
“Tanba eleisaun suku ba tinan ne’e importante tebes, sira sei sai autoridade ne’ebé maka nesesidu no ativu tebes iha programa dezenvolvimentu nasionál ninian, liga mós prioridade Governu ne’e nian atu halo desentralizasaun ba munisipíu hotu-hotu, tan ne’e ohin ami husu, iha prosesu eleisaun suku ne’e presiza la’o ho demokratikamentu votu ne’e tenke mai hosi povu, nune’e sé mak eleitu karik bele iha pezu hodi serbí ba populasaun sira ho dignu,” nia fó hanoin.
Prezidente Autoridade RAEOA, Arsénio Paixão Bano, informa, reprezenta Autoridade RAEOA orgullu, ho prezensa membru Nonu Governu bele haforsa-tán servisu Estadu nian iha Oé-Cusse.
“Ha’u kontente tebes, tanba ohin primeira vizita hosi membru Governu, hosi MAE, tanba aliende mai vizita kortezia no halo observasaun jerál ba implementa programa sira ne’ebé ita hala’o ona iha Oé-Cusse, ida-ne’e orgullu boot, tanba bele haree direitamente no observa, ho objetivu atu oinsá lori rai ne’e kontinua ba oin nafatin,” nia orgullu.
Notísia relevante: PN aprova OR 2023 ba MAE $52.764.796 iha espesialidade
Jornalista: Abílio Elo Nini
Editór: Evaristo Soares Martins
