DILI, 24 agostu 2023 (TATOLI)—Primeiru-Ministru (PM), Kay Rala Xanana Gusmão, apela ba Deputadu sira iha Parlamentu Nasionál (PN) atu fiskaliza serbisu Governu nian ba ezekusaun orsamentu no programa sira-ne’ebé órgaun soberania daruak ne’e aprova.
Notísia Relevante: PN dezeja susesu ba IX Governu ezekuta OR benefísia povu
“Hodi IX Governu nia naran halo apelu ida boot tebe-tebes ida, fiskaliza ami, imi-nia déver, la’ós de’it opozisaun maibé imi hotu tenke fiskaliza, nune’e buat ne’e bele la’o di’ak. Ha’u sala tenke krítika, hahú hosi ita-boot sira,” PM Xanana hateten hafoin PN halo aprovasaun finál globál ba proposta-lei Orsamentu Retifiaktivu (OR) ba 2023 iha sala plenára PN, kinta ne’e.
Xefe Governu ne’e hato’o agradesimentu ba kontribuisaun Deputadu hotu iha debate proposta-lei Orsamentu Retifikativu (OR) durante loron tolu (3) ne’ebé di’ak tebes no ho krítiku konstrutivu.
“Ema hotu-hotu ne’ebé mai partisipa loron tolu nia laran kedas iha ne’e, ita krítika malu ne’e, buat ida baibain, normál, rona, apreende ba malu,” Xanana hateten.
Primeiru-Ministru, Kay Rala Xanana Gusmão, husu atu la’o hamutuk hodi serbisu povu ida-nia moris di’ak.
“No, husu mós iha buat balun ne’ebé tinan lima ne’e ita atu halo hamutuk, favór ida ita hamutuk ba, atu serbi povu ida-ne’e,” nia dehan.
Notísia Relevante: PN aprova proposta Orsamentu Retifikativu biliaun $1,7 iha finál globál
Jornalista : Nelson de Sousa
Editór : Cancio Ximenes
