DILI, 24 agostu 2023 (TATOLI)–Sekretáriu Estadu Formasaun Profisionál no Empregu (SEFOPE), Rogério de Araújo Mendonça, hateten, Governu seidauk iha baze legál atu rekolla osan $30 hosi kada traballadór timor-oan sira ne’ebé serbisu iha Austrália no Koreia Súl, hanesan informasaun ne’ebé espalla iha rede sosiál.
Maski nune’e, Governu iha planu kria baze legál, ne’ebé molok to’o faze ne’e sei iha uluk sosializasaun. Daudaun iha hela prosesu sosializasaun, nune’e bainhira iha prosesu ne’e traballadór sira aseita hotu mak bele implementa.
“Atu klarifika katak seidauk iha baze legál ida atu rekolla osan hosi traballadór. SEFOPE sosializa de’it, se tinan-tinan Governu hasai osan hodi fó formasaun ba joven sira hodi sira iha kbiit hetan empregu, entaun oinsá sira kontribui fali ba Estadu, atu dehan seidauk ko’a traballadór nia osan sentavu ida mós laiha, no atu deside ko’a mós ami sei lori esbosu dekretu lei ka lei ruma aprova iha Konsellu Ministru, daudaun ami foin halo sosializasaun de’it seidauk implementa,” Sekretáriu Estadu dehan iha resintu Parlamentu Nasionál, kinta ne’e.
Notísia relevante : Traballadór timor-oan serbisu iha Austrália hetan ona remesa millaun $200 resin
Kada tinan Governu gasta osan millaun $1,7 hodi halo investimentu ba kapasitasaun kandidatu traballadór ne’ebé maioria joven, nune’e Governu iha esperansa bele kontribui fali ba Estadu.
“Bainhira atu ko’a mós ba de’it traballadór ne’ebé Governu investe, hanesan traballadór iha Koreia no Austrália, enkuantu sira seluk hanesan iha Inglatera no nasaun seluk ne’e laiha tanba sira ba privadu,” nia akresenta.
Tuir governante ne’e, bainhira iha sosilizasaun mak traballadór sira aseita ko’a osan maka sei kria diploma ministeriál ruma hodi lori ba Konsellu Ministru no Parlamentu Nasionál.
“Kuandu traballadór sira maioria la aseita automátikamente la implementa, maibé implementa duni mós sei loke konta ida hodi rai hamutuk osan sira ne’e,” Sekretáriu Estadu tenik.
Durante ne’e Governu seidauk simu osan ruma hosi traballadór sira hanesan reseita ida, maibé hanesan remesa de’it.
Jornalista : Antónia Gusmão
Editora : Julia Chatarina
