VIQUEQUE, 25 agostu 2023 (TATOLI)—Diretora Ezekutiva Organizasaun Naun Govermentál, Fórum Komunikasaun ba Feto Timor-Lorosa’e (FOKUPERS), Maria Fátima Pereira Guterres, enkoraja foin-sa’e sira hosi munisípiu Viqueque atu hadi’a abilidade hodi lori nasaun Timor-Leste iha futuru.
Nia konsidera, foin-sa’e nu’udar futuru líder nasaun, tanba ne’e presiza koko hadi’a-an no sai ema ne’ebé di’ak liu.
Kestaun ne’e nia hato’o relasiona ho komemorasaun loron mundiál foin-sa’e iha loron 12 agostu.
“Atu konkretiza ida-ne’e, ita presiza prepara-an, prepara kapasidade hodi sai ema ne’ebé kualifikadu. Tanba ne’e, ha’u prepara joven sira atu labele monu ba grupu provoka malu no kria problema. Iha ita-nia moris pelumenus kria netik istória di’ak, iha ita-nia paixaun moris hahú hosi munisípiu to’o nasionál,” Diretora hateten iha ámbitu semináriu komemorasaun loron mundiál foin-sa’e, iha salaun munisípiu Viqueque, sesta ne’e.
Notísia relevante : Timor-Leste no Portugal asina akordu formasaun ba foin-sa’e
Tinan ne’e komemora loron foin-sa’e ho tema ‘hasa’e foin-sa’e sira-nia abilidade hodi fó kontribuisaun ba mundu, sustentablidade no amigável.’
Durante ne’e FOKUPERS serbisu hamutuk ho Ministériu Solidaridade Sosiál no organizasaun sira seluk hodi responde ba violénsia bazeia ba jéneru.
“Nune’e ajénsia no sosiadade tomak refleta liután oinsá ita bele kontribui hodi hadi’a foin-sa’e sira-nia situasaun no hadi’a abilidade, tanba sira maka futuru líder Timor Leste maibé tuir ita-nia haree, foin-sa’e sira dala barak kria baku malu, ida-ne’e sai ita hotu nia problema ne’ebé presiza kontribui hosi parte hotu-hotu, liu-liu eduksaun, saúde família no sosiadade,” nia akresenta.
Diretora haree família maka sai baze edukasaun hodi forma membru família sira, tanba ne’e ema hotu-hotu presiza tau hanoin hodi serbisu hamutuk haree ba kestaun foin-sa’e sira.
Tuir dadus hosi FOKUPERS, foin-sa’e kada tinan barak liu hasoru kazu violénsia bazeia ba jéneru, tantu violénsia doméstika, kazu insestu no kazu sexuál, ho totál 300 resin, ne’ebé 80% envolve foin-sae.
“Tanba ne’e ha’u hanoin tempu agora ita presiza esforsu hamutuk hodi haree ba foin-sa’e sira labele monu ba kazu sira ne’e,” nia realsa.
Iha fatin hanesan, Sekretáriu Administradór munisípiu Viqueque, Teotónio Sarmento da Silva, agradese ba organizasaun FOKUPERS ne’ebé deside komemora loron mundiál iha munisípiu Viqueque hodi ko’alia kona-ba prevensaun violénsia doméstika liga ba violénsia bazeia ba jéneru.
“Atu halo prevensaun violénsia bazeia ba jéneru, ha’u prefere hamutuk ita promove igualdade jéneru liuhosi komunikasaun saudável hodi konstrui família, komunidade no sosiadade livre hosi violénsia hasoru feto no labarik feto,” Reprezentante administrasaun Viqueque fó hanoin.
Atividade ne’e hetan patrtisipasaun hosi autoridade lokál, diretór liña ministeriál inklui estudante sekundáriu sira.
Jornalista : Vitorino Lopes da Costa
Editora : Julia Chatarina
