VIQUEQUE, 25 agostu 2023 (TATOLI)—Veteranu nia oan hamutuk 160 iha munisípiu Viqueque sai ona benefisiáriu ba bolsa estudu kombatente libertasaun nasionál, iha tinan 2023 ne’e.
“Lista asesu ba bolsa estudu daudaun taka ona iha edifísiu Konsellu Veteranu Viqueque, agora hein reklamasaun mosu maka bele hadi’a, karik durante fulan-ida. Prosesu selesaun ne’e foin lalais haree bazeia ba valór, ba bolsa estudu ne’ebé ministériu oferese ba kada munisípiu sira,” Sekretáriu Ezekutivu Konsellu Veteranu munisípiu Viqueque, Daniel Sarmento Soares ‘Fogeti’, informa ba Agência Tatoli, iha ninia knaar fatin, Viqueque Vila, sesta ne’e.
Notísia relevante : MKLN Viqueque hahú rejista veteranu no martir nia-oan hodi asesu bolsa estudu
Antes ne’e, estudante sira hatama hotu ona sira-nia konta bankária tanba orsamentu sei transfere ba estudante sira-nia konta iha fulan-setembru nia laran.
“Tanba ne’e, ita-nia estudante sira-nia konta tenke loos atu ministériu relevante transfere karik labele sala,” nia akresenta.
Tuir dadus, estudante asesu bolsa estudu kompostu hosi pré-primária na’in-hitu pré-senkundária na’in-32, sekundária na’in-50, universidade rai-laran na’in-71 no universidade rai-li’ur na’in-lima mak rejista maibé na’in-rua mak liu, tolu seluk la liu tanba dokumentu la kompletu.
“Orsamentu ne’ebé Governu oferese ba veteranu nia oan sira, inan aman tenke tau-matan atu uza orsamentu ba estudu. Ha’u hakarak apela ba inan aman sira labele uza osan estudante sira ba kestaun kultura,” nia fó hanoin.
Tinan oin sei iha tan programa hanesan, tanba ne’e reprezentante veteranu husu oan sira atu estuda didi’ak hodi hetan valór di’ak no bele hetan oportunidade asesu programa Governu.
“Ha’u husu ba veteranu nia oan sira ne’ebé seidauk asesu ba bolsa estudu, oportunidade sei iha nune’e agora tenke prepara-an estudu tanba tinan oin bolsa sei iha,” nia tenik.
Jornalista : Vitorino Lopes da Costa
Editora : Julia Chatarina
