iklan

EDUKASAUN, HEADLINE

Vise-Prezidente INFORDEPE na’in-tolu toma pose

Vise-Prezidente INFORDEPE na’in-tolu toma pose

Vise-Prezidente INFORDEPE na’in-tolu toma pose. Foto/Facebook.

DILI, 25 agostu 2023 (TATOLI) – Sekretáriu Estadu Edukasaun, Ensinu Sekundáriu ba Eskola Téknika, Domingos Lopes Lemos, fó pose ba vise-prezidente na’in-tolu husi Institutu Nasionál Formasaun Dosente no Profisionál Edukasaun (INFORDEPE).

Emposadu na’in-tolu ne’e mak Maria Madalena Lopes nu’udar Vise-Prezidente ba Asuntu Formasaun Akadémika, Verónica Morreira Correia hanesan Vise-Prezidente ba Asuntu Formasaun Profisionál no Kontínua no Sebastião de Oliveira asume Vise-Prezidente INFORDEPE.

Verónica Morreira Correia hatete nia sei kontinua planu no programa ne’ebé maka VIII Governu kria ona, nune’e bele aselera tiha programa formasaun sira ne’ebé iha ona faze finál. Hafoin tama ba 2024 maka sei implementa fali planu IX Governu nian hodi dijitaliza formasaun sira no sei kontinua halo kooperasaun ho parseiru dezenvolvimentu sira tantu nasionál komu internasionál hodi bele fó apoiu iha área formasaun nian.

Iha ámbitu tomada pose ne’e, Sekretáriu Estadu Domingos Lopes Lemos husu ba emposadu sira atu hatudu sira-nian responsabilidade ida serbisu.

“Juramentu ne’ebé imi halo ona iha ami hotu nia oin ne’e, sai hanesan bukae ida atu haforsa ita-boot sira-nian serbisu iha tinan haat nia laran, konta husi ohin simu ona pose ne’e”, governante dehan iha salaun Ian Martin, Balide.

Nia husu mós atu vise sira ne’e hala’o serbisu ho di’ak tuir duni ida-idak nia kompeténsia no labele simu tiha kargu depois bá halo fali serbisu seluk ne’ebé laiha ligasaun ho sira-nian knaar.

“Buka apoia no tulun prezidente hodi tau-matan ba destinu profesór sira-nian, nune’e bele lori dezenvolvimentu ida di’ak ba edukasaun iha Timor-Leste atubele garante kualidade iha futuru”, realsa.

Lembra katak Prezidente INFORDEPE, Domingos Martins, simu ona pose iha loron 07 fulan-agostu. Hafoin pose dirijente ne’e kompromete katak sei halo esforsu hodi kontinua programa formasaun no kapasitasaun ba dosente sira atu labele lakon sira-nian direitu ba formasaun adekuada iha futuru.

Ministra Edukasaun, Dulce de Jesus, ne’ebé fó pose ba prezidente refere husu atu kria modelu formasaun distánsia ka online ba profesór sira, nune’e labele abandona alunu sira.

Tuir governante, durante ne’e manorin sira uza tempu barak ba formasaun, maibé prejudika fali estudante sira tanba latuir dixiplina.

Domingos Martins dehan sistema ida ne’e la’ós buat foun, maibé polítika ida ne’ebé Ministra Edukasaun hato’o ne’e atu fanu hodi buka hadi’a fali sistema sira ne’ebé maka INFORDEPE instala ona tanba antes ne’e mós institutu halo ona kooperasaun ho ajénsia dezenvolvimentu sira.

To’o dezembru 2022, INFORDEPE realiza ona formasaun akadémika no kontínua ba profesór timoroan hamutuk 8.741.

Notísia relevante: ME husu Prezidente foun INFORDEPE kria modelu formasaun distánsia ba profesór sira

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!