Xefe suku Ogues husu loke feira labele promove jogu “Bola Guling”
COVALIMA, 25 agostu 2023 (TATOLI)–Xefe Suku Ogues, Faustino de Araúju, husu ba Administrasaun Munisípiu Covalima atu labele promove jogu bola guling iha feira tanba autoridade nia polítika antes ne’e loke feira atu promove produtu lokál.
Notísia Relevante: Autoridade Covalima promove produtu lokál komemora loron FALINTIL-Konsulta Populár
“Ha’u-nia sujestaun bainhira ita loke feira hodi komemora loron nasionál sira, labele promove jogu bola guling, tanba loke jogu bola guling ida-ne’e hamosu problema oioin,” Faustino de Araúju hatetetn ba jornalista sira iha salaun AMC, Sukaer Laran.
Líder komunitária ne’e sujere, ba futuru bainhira planu loke feira hodi komemora loron nasionál sira, tenke halo koordenasaun didi’ak ho Inspesaun Jerál do Jogo (IGJ) no labele atu promove fali jogu bola guling tanba jogu ne’e diverte ema maibé la eduka ema ho di’ak.
Iha komemorasaun loron FALINTIL no loron Konsulta Populár ne’ebé autoridade Covalima loke feira iha suku Suai Loro, postu administrativu Suai, komunidade antuziazmu hodi vizita feira la’óss atu promove no haree produtu lokál maibé intensaun atu promove fali jogu bola guling.
Diretór Servisu Munisipál Jestaun no Turizmu, Vitorino do Carmo, rekoñese katak feira ne’e inklui mós jogu bola guling iha laran, nune’e nia parte sei halo avaliasaun bainhira ba futuru loke feira sei haree fali kestaun ida-ne’e.
“Ami rekoñese ida-ne’e hanesan erru atu halo avaliasaun, nune’e ba futuru labele akontese tan. Ami ho Administradór ami loke feira atu promove produtu lokál no arte zenatu no seluk tan iha Covalima,” nia dehan.
Razaun bainhira loke feira atu promove de’it produtu lokál no jogu bola giling hanesan atividade komplementár, maibé atividade komplementár boot liu atividade ne’ebé autoridade Covalima atu promove produtu lokál.
“Autoridade Covalima loke feira hodi komemora loron FALINTIL no loron Konsulta Popular atu hatene ita-nia ema sira-nia abilidade halo transformasaun produtu lokál. Ita atu koko ida-ne’e no hanesan arte zenatu atu hatene grupu ne’ebé estabelese ona,” nia dehan.
Sekretáriu Administrasaun, Munisípiu Covalima, Francisco de Jesus Alves, reforsa autoridade Covalima loke feira ne’e lakoi atu loke jogu bola guling maibé bazeia ba esperiénsia hatudu bainhira la loke jogu bola guling mak partisipasaun komunidade ladun másimu iha feira ne’e.
“Ita mos hakarak bainhira loke feira labele iha jogu bola giling, maibé bazeia ba esperiénsia ne’ebé hatudu, komemora loron nasionál 20 maiu iha tinan 2018 hatudu katak partisipasaun ema laiha no halo grupu negósiu kiik la hetan rendimentu,” nia esplika.
Bazeia ba esperiénsia ne’ebé no ema barak hato’o rekomendasaun bainhira loke feira promove de’it produtu lokál no la loke jogu bola guling, entaun partisaun ema ladún iha, tanba ho esperiénsia hirak ne’e bainhira loke feira loke mós jogu bola guling tanba hanesan kustume oinsá atu atrai ema.
“Ita loke bola guling fó impaktu negativu maibé halo negósiu kiik hetan rendimentu di’ak hodi sosa hahan ne’ebé grupu negósiu kiik sira faan,” nia dehan.
Administradór Munisípiu Covalima fó oriéntasaun ba administradór postu sira atu mobiliza komunidade hosi postu hodi promove produtu lokál no diretór sira prepara stan atu promove nia servisu, nune’e komundiade sira bele haree maibé realidade laiha ida mak atu halo rejistu. Loloos ita kopera malu, nune’e ita bele promove atividade pozitivu hanesn kada postu no xefe suku sira harii ida-ida nia stand hodi promove ita-boot sira-nia servisu durante ne’e,” nia hateten.
Entretantu, atu komemora loron FALINTIL 20 agostu no loron Konsulta Populár 30 agostu, Covalima aloka orsamentu $7,878,75 ne’ebé aloka boot liu ba atividade kompetisaun kuda halai taru kuaze 4000-resin ne’ebé fahe ba preparasaun fatin aloka $ 900 no orsamentu fó prémiu ba vensedór hosi klaese B, C, D no E aloka hamutuk $3,525.
Jornalista : Celestina Teles
Editór : Cancio Ximenes
