DILI, 28 agostu 2023 (TATOLI)–Embaixadora Cuba iha Timor-Leste, Grisel Alina Aldama Innis, hateten, Governu Cubanu hein desizaun hosi parte Timor-Leste atu harii fábrika prodús medikamentu iha Timor-Leste.
“Projetu ida-ne’e iha tinan kotuk (2022), daudaun ami informa tiha ona ba Governu foun (IX Governu), ne’ebé ami hein de’it ona desizaun hosi Governu tanba Cuba prontu nafatin apoia kuandu iha ona desizaun ruma,” Embaixadora Grisel Alina Aldama Innis, hateten hafoin hasoru malu ho Primeiru-Ministru, Kay Rala Xanana Gusmão, iha Palásiu Governu, segunda ne’e.
Nasaun Cuba iha interese no prontu atu apoia loke fábrika medikamentu no atu lori matéria prima hodi kolabora ho Servisu Autónomu Medikamentu no Ekipamentu Saúde (SAMES) halo produsaun ai-moruk iha Timor-Leste.
Notísia relevante: Xefe Estadu rekomenda Governu halo parseria loké fábrika medikamentu iha rai-laran
Diplomata ne’e nota rekursu umanu Timor-Leste nian sufisiente atu hola parte iha fábrika ne’e, maibé Cuba mós disponível apoia tan rekursu iha produsaun medikamentu.
Cuba iha interese hakarak investe iha Timor-Leste iha área produsaun medikamentu farmásia tanba haree katakTimor-Leste sei dependénsia maka’as ba importasaun medikamentu, tanba ne’e Cuba hakarak tulun Governu atu sai hosi situasaun ne’e hodi prodús rasik ai-moruk iha rai-laran.
Jornalista : Antónia Gusmão
Editora : Julia Chatarina
