DILI, 28 agostu 2023 (TATOLI)–Embaixadora Cuba iha Timor-Leste, Grisel Alina Aldama Innis, hasoru malu ho Primeiru-Ministru, Kay Rala Xanana Gusmão, segunda ne’e, hodi reafirma kompromisu Cuba apoia Timor-Leste iha área saúde.
Apoia sira liu-liu kapasitasaun médiku timor-oan iha Cuba no médiku espesialista Cubanu iha Timor-Leste.
“Timor-Leste ho Cuba iha relasaun amizade di’ak tebes tanba iha ona baze legál hodi sai mata-dalan ida ba Cuba apoia Timor-Leste iha área hotu-hotu, liu-liu mak médiku sira ne’ebé estuda iha Cuba no mós médiku Cubanu sira iha Timor. Importante atu ita hatene katak graduasaun estudante timor-oan sira iha Cuba la’ós hosi medisina de’it maibé iha mós formandu iha pedagojia no arte,” Grisel Alina hateten hafoin hasoru malu ho Xefe Ezekutivu, iha Palásiu Governu, segunda ne’e.
Notísia relevante : PR Horta-Embaixadora Cuba iha TL diskute kooperasaun iha área saúde
Nia dehan, estudante hirak ne’ebé mak hala’o estudu iha Cuba iha mós oportunidade atubele hala’o estudu iha área arte no sira bele hala’o iha nível lisensiadu no mestradu.
Aleinde ne’e, Cuba fó apoia mós iha área desportu, ne’ebé antes ne’e serbisu hamutuk ho Sekretaria Estadu Juventude no Desportu no Universidade Nasionál Timor-Lorosa’e (UNTL) hodi kapasita estudante sira. Enkuantu, iha área arte no kultura, apoia konserva identidade.
Jornalista : Antónia Gusmão
Editora : Julia Chatarina
