Governu TL lamenta desizaun hosi Governu rejime militár Myanmar
DILI, 28 agostu 2023 (TATOLI)—Vise Ministru Asuntu Parlamentár, Adérito Hugo da Costa, hateten pozisaun Governu Timor-Leste (TL) lamenta ho desizaun hosi Governu rejime militár Myanmar nian ne’ebé espulsa misaun diplomata liuhosi reprezentante enkaregadu negósiu Timor-Leste iha Myanmar.
Notísia Relevante: PM Xanana husu líder membru ASEAN fó solusaun ba problema Myanmar
“Pozisaun Governu nian klaru. Medida ne’ebé Governu rejime militár halo ba ita-nia misaun diplomatika iha Myanmar, primeiru Governu Timor-Leste lamentável ba desizaun ida-ne’e. Maibé, segundu, rejista ita-nia pozisaun ida forte ba kestaun direitu umanu, justisa, demokrásia. No, mensajen klaru hosi Primeiru-Ministru nian dezde tomada pose klaru, kuandu ita-nia volume preparativu ba atu sai kompleta membru plena ASEAN ninian, ita ba labele ba ho nível atinjimentu ba demokrásia, maibé tinan 20 Timor-Leste hanesan Estadu direitu demokrátiku,” Vise Ministru ne’e hateten ba jornalista sira iha uma fukun Parlamentu Nasionál, segunda ne’e.
Timor-Leste ninia mensajen ne’ebé klaru liuhosi Primeiru-Ministru iha diskursu toma pose to’o ikus hatudu duni ba rejime militár Myanmar nian hodi fó resposta hodi halo espulsa Timor-Leste nia reprezentante misaun diplomátika ne’ebé reprezenta Estadu iha Myanmar.
Entaun, Timor-Leste nafatin konsistente ba diskusaun iha nível ASEAN no mós ba iha globál ita sempre tau ba iha nível altu respeita ba direitu umanu, justisa no prosesu demokratizasaun.
“Timor sempre ho saida mak akontese resposta negativu hosi rejime militár Myanmar nian ba ita-nia pozisaun, hatudu katak ita-nia pozisaun forte ba diskusaun iha nível ne’ebé de’it Timor-Leste nia prezensa kuandu ko’alia kona-ba demokrásia, direitu umanu no justisa. Nune’e mós refleta estatutu Timor-Leste nian ne’ebé komunga prinsípiu universál hanesan Estadu direitu demokrátiku,” nia hateten.
Dezde inísiu Timor-Leste restaura nia indepedénsia fó solidariedade ba nasaun sira-ne’ebé hela iha ditadura ka estatutu bolu autodeterminsaun, Timor-Leste nafatin fó solidariedade no respeita desizaun sira nível rejional nian, maibé prinsípiu ba autodeterminasaun no direitu umanu hanesan mós Timor-Leste uluk luta hela ba atu hetan ninia autodeterminsaun hetan solidariedade nasaun sira seluk iha mundu.
“Tanba saida mak ita-nia pozisaun klaru Governu Timor-Leste nian liuliu IX Governu nia pozisaun katak, ita komprometidu atu kompleta rekezitu hotu-hotu atu sai membru plena ASEAN nian. Maibé, relasiona ho asuntu kontextu Myanmar nian ita fó ita-nia pozisaun katak, mezmu ami prienxe serbisu extraordináriu atu prienxe rekezitu ser membru plena ASEAN ninian, maibé ami la taka matan ba direitu povu país ida-nian atu goza liberdade sidadaun ninian direitu umanu no liuliu prinsípiu sira-ne’ebé ita komunga,” nia dehan.
Nia akompaña, Prezidente Repúblika mós reitera pozisaun ezekutivu nian hosi Primeiru-Ministru hodi fó resposta jestu halo esplusa diplomata Timor-Leste iha Myanmar ne’e hateten ho pasu ida avansadu liután posizaun Timor-Leste konsistemente ko’alia kona-ba defende direitu umanu, justisa no demokrásia.
Notísia Relevante: Akadémiku konkorda ho deklarasaun Xanana hodi husu líder ASEAN rezolve kestaun Myanmar
Jornalista : Nelson de Sousa
Editór : Cancio Ximenes
