DILI, 28 agostu 2023 (TATOLI) – Profesór permanente hamutuk 1.275 hetan oportunidade hodi partisipa iha kursu baxarelatu iha Universidade Nasionál Timor-Lorosa’e (UNTL), maibé formasaun akadémika ida ne’e seidauk realiza tanba Institutu Nasionál Formasaun Dosente no Profisionál Edukasaun Timor-Leste (INFORDEPE) sei reverifika dadus manorin sira-nian.
Prezidente INFORDEPE, Domingos Martins, esplika katak verifikasaun dadus ne’e hodi garante katak bainhira desizaun husi Ministra Edukasaun atu aselera formasaun maka sei la hamosu dezentendimentu ruma.
“Reverifikasaun ne’e atu haree mós situasaun jerál profesór sira ligadu ho sira-nian idade. Profesór sira ne’e balun goza ona rejime espesiál, keta balun sei iha hela estatutu kontratadu no balun tuir ona kursu komplementár karik, ida ne’e maka ita presiza halo”, dirijente ne’e hatete iha Balide.
Tuir responsavel, oportunidade ne’ebé maka Ministériu Edukasaun fó ba dosente sira atu kontinua formasaun akadémika iha UNTL ne’e ba sira ne’ebé maka tama kategoria profesór permanente no ho idade másima 50. “Bainhira formasaun ne’e remata profesór sira ne’e sei iha tinan 10 hodi fó nia kontribuisaun ba iha prosesu dezenvolvimentu edukasaun”, katak.
INFORDEPE no Ministériu Edukasaun daudaun ne’e halo hela prosesu negosiasaun ida hodi revee mós rekizitu balun relasiona ho implementasaun kursu akadémiku, nune’e bele aselera lalais nia realizasaun ne’e.
Rekorde katak Dekanu Fakuldade Edukasaun, Arte no Umanidade, Teodoro Soares, antes ne’e hatete formasaun ba manorin sira ne’e sei hala’o iha kada munisípiu, tanba sira nu’udar profesór ein karreira no labele husik sira-nia responsabilidade ba alunu sira.
Formasaun baxarelatu aseleradu ba profesór sira ne’e hatuur ona iha kontratu ho nia durasaun tempu ba tinan tolu. Kooperasaun entre INFORDEPE no UNTL hala’o dezde tinan hira liu-bá kotuk, maibé ba tinan ida ne’e demora uitoan tanba presiza hetan konkordánsia entre parte rua.
Notísia relevante: Profesór 1.275 sei partisipa kursu baxarelatu iha UNTL
Jornalista: Tomé Amado
Editora: Maria Auxiliadora
