DILI, 29 agostu 2023 (TATOLI)—Reuniaun Konsellu Ministru iha tersa ne’e, delibera ona hodi aprova kalendáriu preparasaun Orsamentu Jerál Estadu (OJE) tinan 2024, ne’ebé aprezenta hosi Ministra Finansa, Santina José Rodrigues Viegas Cardoso.
“Tuir kalendáriu ne’ebé aprova ona, to’o loron 07 setembru sei identifika no define atividade anuál no plurianuál. Semináriu Jornada Orsamentál ne’e sei hala’o iha loron 08 setembru no iha loron 13 setembru Konsellu Ministru sei aprova tetu orsamentál,” Ministru Prezidensia Konsellu Ministru, Agio Pereira, informa hafoin reuniaun ezekutivu, iha Palásiu Governu.
Notísia relevante : PN aprova proposta Orsamentu Retifikativu biliaun $1,7 iha finál globál
Enkuantu, liña ministeriál sira tenke finaliza sira-nia proposta orsamentál to’o loron 29 setembru hodi Komité Revizaun Orsamentál bele analiza hahú hosi loron 20 outubru.
Hafoin ajustamentu nesesáriu ba proposta setoriál sira, Konsellu Ministru sei aprova projetu proposta lei Orsamentu Jerál Estadu 2024 iha loron 31 outubru no sei entrega ba Parlamentu Nasionál iha loron 15 novembru.
Jornalista : Antónia Gusmão
Editora : Julia Chatarina
