iklan

MUNISÍPIU, VIQUEQUE

Veteranu Viqueque prefere Governu tau prioridade ba dezenvolvimentu

Veteranu Viqueque prefere Governu tau prioridade ba dezenvolvimentu

Sekretáriu Ezekutivu Konsellu Veteranu munisípiu Viqueque, Daniel Sarmento Soares ‘Fogeti’. Imajen Tatoli/Vitorino Lopes da Costa

VIQUEQUE, 29 agostu 2023 (TATOLI)—Sekretáriu Ezekutivu Konsellu Veteranu munisípiu Viqueque, Daniel Sarmento Soares ‘Fogeti’, prefere Governu tau prioridade ba dezenvolvimentu iha Timor-Leste.

“Ami-nia reflesaun ba komemorasaun loron konsulta populár 30 agostu 1999 ba tinan ne’e ba dala-24, ita foin ukun rasik-an, maibé ninia efeitu boot tebes ba povu no nasaun, dezenvolvimentu mós la’o, maibé neineik liu. Tanba ne’e ha’u hanoin prosesu dezenvolvimentu la’o, governate sira tenke tau seriedade ba prosesu dezenvolvimentu tanba ami haree ne’e dalaruma prosesu dezenvolvimentu la’o maibé derrepente parradu,” Veteranu Viqueque hateten ba Agência Tatoli, iha ninia knaar fatin, Viqueque Vila, tersa ne’e.

Nia mós nota katak dezenvolvimentu la’o, maibé ninia kontinuidade ladún di’ak, tanba ne’e tenke tau prioridade ba dezenvolvimentu hodi povu bele goja ukun rasik-an inklui tau priodade mós setór ekonómia rai-laran.

“Ita haree iha VI no VII Governu nia mandatu projetu balun la kontinua. Ezemplu hanesan projetu tasi mane, tanba dala barak Governu sempre konvida ami ba partisipa enkontru ne’ebé iha ligasaun ho projetu tasi mane, ne’ebé ninia prosesu iha tinan 2021 hahú halo infraestrutura iha parte Betano no Beaço Viqueque no tinan 2025 LNG mai ona Timor, maibé seidauk akontese tanba VIII Governu seidauk halo infraestrutura no seidauk fó indemnizasaun ba afetadu sira,” nia akresenta.

Notísia relevante : Veteranu Viqueque husu ba ukun-na’in atu ka’er metin unidade nasionál

Aleinde ne’e, prosesu identifikasaun iha área afetadu Beaço foin lalais iha mandatu VIII Governu halo ona, maibé pagamentu ba indemnizasaun seidauk.

“Ha’u iha esperansa IX Governu bele kontinua projetu tasi mane Beaço no Betano hodi loke kampu traballu ba timor-oan sira tanba bainhira projetu ne’e loke, sei presiza ema barak serbisu iha ne’ebá. Asuntu ne’e ha’u sente importante tebes ba ita-nia nasaun Timor Leste,” nia tenik.

Iha sorin seluk, hafoin ukun-an, iha tinan 2023, Governu hahú rejista ema ne’ebé uluk kontribui ba prosesu luta libertasaun nasionál hodi hetan pensaun veteranu iha tinan 2011. Iha tinan 2009 loke tan prosesu rejistu, maibé agora mak foin iha faze verifikasaun hotu nune’e dala ruma tama ba tinan 2024 maka foin hetan direitu.

Tuir dadus tinan 2009 iha Viqueque, ema na’in-3.000 tama ona verifikasaun, enkuantu na’in-4.000 seidauk verifika.

Enkuantu, bolsa estudu ba veteranu nia oan, iha tinan 2021 loke rejistu, ne’ebé kada munisípiu hetan bolsa estudu 100, iha tinan 2022 sa’e ba ema na’in-160.

“Ha’u hanoin veteranu ladún iha problema, maibé ita-nia dezafiu maka prosesu la’o neineik, maibé tenke beibeik no la’o ba nafatin,” nia hato’o.

Governu presiza tau hanoin hodi halo estrada liga ba aldeia, suku no postu sira hodi komunidade sira bele halo movimentu ho di’ak no lori produtu ba merkadu.

“Agora estrada iha Viqueque foin halo oituan, maibé ba aldeia sira área rurál seidauk no dalan sira iha tempu udan ho kondisaun grave. Infraestura ne’e kestaun importante ida maka estrada tanba fasilita povu hodi lori sira-nia produtu ba nasionál,” Veteranu ne’e fó hanoin.

Munisípiu Viqueque mós presiza iha ospitál ida nune’e bainhira moras boot ruma, pasiente la presiza to’o Baucau no nasionál.

“Foin lalais abintante sira oferese ona rai ba administrasaun munisípiu viqueque hodi harii ospitál, ne’e importante tebes ba povu Viqueque tanba bainhira moras ruma grave tenke halai bá Baucau no Dili, tanba fó terus ba família sira ne’ebé hein moras,” nia prefere.

Relasiona ho komemorasaun loron konsulta populár, Konsellu Veteranu Viqueque sujere IX Governu Konstitusionál hodi haloot eroi restu mortál ne’ebé sei rai iha uma-mahon.

“Ohin loron ita hetan liberdade ona, ita tenke hanoin ona haloot ita-nia maluk sira ne’ebé kontribui ba luta libertasaun tanba ita rekolla balun ona, maibé rai de’it iha osouáriu sira ne’e, ha’u sente ladún di’ak. Bainhira rai de’it hanesan ne’e matebian sira bele babeur ita, nune’e ami-nia esperansa ba Governu haloot ona restu mortál sira-ne’e. Tanba agora ami labele rekolla tan, haloot tiha hirak ne’ebé iha Osoáriu hotu maka ami buka rekolla tan restu mortál sira ne’ebé seidauk rekolla,” Sekretáriu Ezekutivu Konsellu Veteranu munisípiu Viqueque relata.

Restu mortál daudaun osoáriu sira hanesan iha Cararas restu mortál hamutuk na’in-49, osoáriu postu Uatulari 400, osauáriu Uefia Lacluta hamutuk 150, Buburlaran Viqueque Vila 19 no osoáriu Abana Nahareka postu Ossu hamutuk 30.

Konstrusaun jardín eroi ida maka daudaun iha prosesu konstrusaun iha postu Uatulari no Viqueque Vila, maibé seluk seidauk hanesan Ossu iha Uka-oan no postu Lacluta iha área Uefia no postu Uatucarbau maka seidauk identifika.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!