VIQUEQUE, 31 agostu 2023 (TATOLI)—Administradór postu Uatulari, munisípiu Viqueque, Manuel do Rosário, enkoraja feto hosi suku neen iha postu Uatulari atu kandidata-an ba xefe suku hodi partisipa iha eleisaun tinan ne’e.
“Kritériu ita atu kandidata-an ba xefe suku no xefe aldeia maka míninu hetan apoiante 1% hosi númeru eleitór suku ida. Tanba ne’e ha’u enkoraja maluk feto sira iha postu Uatulari, tanba lei fó dalan ba feto sira kandidata ba xefe suku,” Administradór Uatulari hateten hafoin ramata abertura edukasaun sívika ba eleisaun xefe suku iha sede suku Afaloikai, kinta ne’e.
Notísia relevante : Eleisaun suku: CNE hahú halo edukasaun sívika ba autoridade komunitária
Nia nota, dala barak organizasaun naun governamentál no Governu sempre ko’alia kona-ba igualdade jéneru, karik mane de’it maka kandidata-an signifika la konsidera feto maluk sira.
“Ita Timor ne’e mane mate barak ona, feto maka kandidata ha’u sente sei manán tanba ita-nia feto maluk sira barak liu. Maibé, ita haree feto la kandidata, dala ruma tauk, moe no kultura. Ha’u husu ba feto sira lalika tauk,” nia akresenta.
Biban ne’e, Administradór fó hanoin ba kandidatu xefe suku sira iha postu Uatulari, katak atu lakon ka manán labele hirus maluk ne’ebé eleitu.
“Se ida-ne’e maka akontese imi seidauk kompreende saida maka demokrasia, ita kompreende eleisaun laiha ema ida maka lakon ka manán, maibé ita foti ema ida sai ita-nia autoridade hodi organiza povu no tau matan ba povu,” nia fó hanoin.
Iha fatin hanesan, Reprezentante organizasaun Feto Potensiál, Filomena do Rosário, hateten, organizasaun daudaun halo ona idadentifikasaun feto hosi suku neen hodi kompete iha eleisaun suku tinan ne’e.
“Foin lalais ami halo ona kontaktu ba ami-nia feto maluk sira iha suku neen hodi husu sira-nia hanoin maka ami foti dadus ne’ebé ami iha feto maka hakarak kandidatu ba xefe aldeia no xefe suku. Feto sira ne’ebé hakarak atu kandidatu hamutuk na’in-15 inklui ha’u mós kandidatu ba xefe suku Afaloikai. Atu kompete ba xefe aldeia no xefe suku la’ós kompete ba liu rai ka kultura sira ne’ebé eziste. Kultura sei nafatin respeita no liurai iha nanis ona,” nia realsa.
Tuir dadus, kandidatu autoridade suku feto hosi suku Matahoi na’in-tolu, Afaloikai na’in-lima, Vessoru na’in-ida, Macadique na’in-rua, Babulu na’in-rua no Uaitame na’in-rua.
Kritériu atu kandidata-an ba xefe suku mak hanesan sidadaun timor-oan, tinan 17 ba leten, tuir resensiamentu eleitorál tenke rejistu no hela iha suku ne’ebé aprezenta kandidatu no tenke hetan apoiante hosi eleitór 1% hosi totál eleitór suku nian.
Dokumentu sira ne’ebé kandidatu xefe suku tenke aprezenta maka formuláriu deklarasaun aseitasaun kandidatura, fotokopia kartaun eleitorál kandidatura, formuláriu deklarasaun apoiante 1% hosi totál eleitorál ne’e no foto koloridu tahan ida.
Eleitór hosi suku Afaloikai na’in-3.191, Uaitame 750 resin no Matahoi 3.344.
Jornalista : Vitorino Lopes da Costa
Editora : Julia Chatarina
