iklan

ELEISAUN

Eleisaun suku: CNE hahú halo edukasaun sívika ba autoridade komunitária

Eleisaun suku: CNE hahú halo edukasaun sívika ba autoridade komunitária

Vise Prezidente CNE, Domingos Barreto. Imajen Tatoli

DILI, 28 agostu 2023 (TATOLI)–Vise Prezidente Komisaun Nasionál Eleisaun (CNE-sigla portugés), Domingos Berreto, hateten iha eleisaun suku ne’ebé sei akontese iha outubru 2023 ne’e CNE hahú halo ona edukasaun sívika ba autoridade komunitária, tanba líder hirak ne’e mak na’in ba eleisuan suku.

“Edukasaun sívika ba eleisaun suku ne’e mak ita halo abertura lansamentu iha Lautém no munisípiu seluk mós la’o hela tanba ita-nia eleisaun suku besik ona, nune’e ami aselera para ita-nia autoridade komunitária mós bele hatutan ba nia komunidade tanba konsellu suku mak organiza eleisaun ne’e,” Domingos Berreto hateten ba Agência Tatoli, iha nia kna’ar fatin, Colmera, segunda ne’e.

Nia hatutan, CNE servisu hamutuk ho autoridade lokál maibé CNE nia parte tun ba terrenu hodi divulga lei ba sira.

“CNE fó edukasaun sívika ba autoridade lokál liga mós ba lei suku nian, nune’e oinsá mak sira bele organiza eleisaun ne’e ho di’ak no oinsá mak ema bele kandidata-aan, edukasaun sívika ne’e importante liu ba autoridade lokál,” nia dehan.

Faze dahuluk, programa edukasaun sívika ne’e hala’o ona iha munisípiu sira hanesan Aileu, Ainaro, Ataúro, Baucau, Bobonaro, Ermera no Lautém no faze daruak realiza iha munisípiu neen seluk inklui Rejiaun Administrativa Espesiál Oé-Cusse Ambeno (RAEOA).

Xefe suku Bebonuk, postu administrtaivu Dom Aleixo, munisípiu Dili, Serafim Maçhado, hateten suku Bebonuk hahú ona hakbesik ba komunidade hodi avizu oinsá atu tuir eleisaun suku tinan ne’e, mezmu Bebonuk suku foun ne’ebé sei akontese eleisaun iha tinan oin.

“Suku Bebonuk rasik preparadu atu kompete iha eleisaun suku. Ami suku foun ne’e tuir leten dehan ami sei realiza eleisaun iha tinan oin maibé ami hahú ona avizu kona-ba oinsá atu tuir eleisaun suku ne’e. Ami Bebonuk preparadu atu kompete iha eleisaun suku no ha’u rasik nafatin kanadidata-an ba maibé ha’u sujere no rekomenda ba alin no inan-feton sira iha Bebonuk atu kandidata-aan no tempu ona ba ita-boot sira atu kompete ho ami mane, tanba feto ho mane iha direitu ne’ebé hanesan no tempu ona atu imi bele hamrik hanesan ho mane iha oin,” nia hateten.

Programa edukasaun sívika ba ámbitu eleisaun líderansa komunitária tinan ne’e, nu’udar papel importante CNE nian ne’ebé mak hatuur iha Konstituisaun RDTL artigu 65 no Lei númeru16/2021 nian.

Iha konstituisaun RDTL artigu 65 (Eleisaun Sira), iha alinea 1 hateten Órgaun eleitu soberania nian ho podér lokál sei hili tuir eleisaun, hosi eleisaun universál, livre, diretu, sekretu ema ida votu ida, no periódiku.

Iha alinea 2 haktuir resenseamentu eleitorál ne’e obrigatóriu, ofisiál no ida de’it no universál no sei atualiza iha eleisaun ida-idak.

Alinea 3 dehan, kampaña eleitorál hala’o tuir PRINSÍPIU hirak tuirmai ne’e:

  1. Liberdade ba propaganda eleitorál;
  2. Oportunidade no tratamentu hanesan ba kandidatura hotu-hotu;
  3. Imparsialidade na’in ulun boot públiku sira-nian kona-ba kandidatura;
  4. Transparénsia no fiskalizasaun sura votu nian.

Iha artigu ne’ e, alinea 4 hatetn, konversaun votu nian iha mandatu hala’o tuir sistema reprezentasaun proporsionál no alinea 5 haktuir prosesu eleitorál sei regula tuir lei.

Iha alinea 6 ne’e dehan, órgaun independente maka sei tau matan ba resenseamentu no eleisaun sira. Lei mak estabelese órgaun ne’e nia kompeténsia, kompozisaun, organizasaun no nia kna’ar.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!