Top

Inocêncio de Andrade eleitu sai Xefe Suku Uetano Fatukuak ho votu 327

Abitante sira partisipa iha eleisaun suku volta daruak. Imajen dok TATOLI

DILI, 30 Outubru 2026 (TATOLI)—Inocêncio Hornai de Andrade manán eleisaun volta daruak sai Xefe Suku Uetano Fatukuak, Postu Administrativu Same, Munisípiu Manufahi, ho votu hamutuk 327. Enkuantu, konkorrente seluk, Eugénio Tomé Tilman Simoes, hetan de’it votu 174.

Eleisaun volta daruak ne’e hala’o iha 26 Outubru 2026, hafoin kandidatu sira la konsege hetan maioria votu ne’ebé presiza iha eleisaun volta dahuluk.

Xefe Departamentu Organizasaun Komunitária Munisípiu Manufahi, Leonia Pinto Correia, hato’o informasaun ne’e liuhosi WhatsApp ba TATOLI, Sesta ne’e.

Kona-ba prosesu eleisaun volta daruak nian, Leonia agradese ba parte hotu ne’ebé kontribui hodi asegura prosesu eleisaun la’o ho di’ak no susesu.

“Agradese ba Nai Maromak, ba natureza, ba lulik no matebian sira, ba parte hotu-hotu, hahú hosi inisiadór, instituisaun no indivíduu sira. Dala ida tan, nia (Inocêncio) agradese no husu nafatin ita-boot sira-nia apoiu ba nia,” nia agradese.

Nia espera katak, ho estrutura Konsellu Suku ne’ebé eleitu ona, lideransa foun bele lori Suku Uetano Fatukuak bá-oin, bazeia ba unidade, efetividade, transparénsia, dinamizmu, neutralidade, objetivu klaru no responsabilidade.

Eleisaun volta dahuluk hala’o iha 10 Outubru 2026, ho kandidatu na’in-tolu, mak Filipe de Araújo, Cecília Amaral no Saul Seixas.

Kontestu

Eleisaun volta daruak ba xefe suku iha Suku Uetano Fatukuak hala’o tanba kandidatu sira iha volta dahuluk seidauk konsege hetan votu maioria ne’ebé presiza atu sai eleitu. Tanba ne’e, kandidatu na’in-rua ne’ebé kontinua kompete avansa ba prosesu votasaun daruak iha 26 Outubru 2026.

Molok eleisaun ne’e, Sekretariadu Tékniku Administrasaun Eleitorál (STAE), hamutuk ho Komisaun Nasionál Eleisaun (CNE) no Polísia Nasionál Timor-Leste (PNTL), distribui materiál eleitorál sensivel no la sensivel ba preparasaun eleisaun volta daruak iha Suku Wetanuk-Fatuk Kuak, Manufahi.

Lee notísia relevante sira:

  1. STAE, CNE no PNTL distribui materiál eleitorál ba segunda volta eleisaun xefe suku iha Manatutu no Manufahi.
  2. Francisca de Carvalho eleita sai Xefe Suku Rembor iha Manatutu.

Jornalista: Osória Marques

Editór: Xisto Freitas da Piedade

 

Publisidade

Leave a Reply

Latest Post

error: Content is protected !!