DILI, 31 agostu 2023 (TATOLI)–Primeiru-Ministru (PM), Kay Rala Xanana Gusmão, informa, Governu planeia realiza semináriu ida hodi partilla ba públiku kona-ba importánsia Timor-Leste sai membru plenu Asosiasaun Nasaun Sudeste Aziátiku (ASEAN, sigla inglés).
“Governu planeia hela atu realiza semináriu ida ho sosiedade sivíl, universidade, no inteletuál sira hodi ita hotu bele kompreende tanba sá mak ita tama ASEAN, atu lori saida mai ita no ita atu fó saida ba ASEAN,” PM Xanana hateten hafoin reuniaun semanál ho Xefe Estadu, iha Palásiu Prezidensiál, Bairru Pite, kinta ne’e.
Notísia relevante : Membru ASEAN husu Timor-Leste kumpre roteiru aprovadu
Xanana hetan ona konvite hodi partisipa iha reuniaun nível a’as ASEAN ne’ebé sei realiza iha tempu badak.
“Prezidente Jokowi haruka konvite ida mai ha’u atu partisipa iha ASEAN summit iha Jakarta. Ita seidauk nu’udar membru plenu maibé nu’udar observadór, ne’ebé ha’u sei ba nu’udar Xefe Governu sei hasoru ho ema boot ASEAN nian, bá rona, apreende tanba ita la’ós full member, bainhira ita tama tiha ona ha’u bele ko’alia ona, ne’ebé bá rona hodi ita prepara-an, prepara ita-nia ema sira, nune’e iha tinan 2025 ita sai full member ona,” nia akresenta.
Foin lalais, Espesialista ba Dezenvolvimentu Rekusu Humanu iha ASEAN, Bob Aubrey hasoru malu ho Primeiru-Ministru, hodi deskute polítika no preparasaun rekursu umanu bainhira Timor-Leste sai membru plenu ASEAN.
Ba ida-ne’e, Xefe Governu argumenta katak importante liu la’ós de’it atu prepara ema maibé mós atu esplika loloos objetivu adere ba asosiasaun rejionál ne’e.
Notísia relevante : Espesialista ASEAN no PM Xanana diskute preparasaun rekursu umanu
Antes ne’e, Antigu Primeiru-Ministru, Taur Matan Ruak, partisipa iha reuniaun nível a’as ASEAN nian iha Labuan Bajo, Indonézia, ne’ebé membru ASEAN sira deside katak Timor-Leste presiza kumpri roteiru ne’ebé sira aprova, liga ho infraestrutura hanesan Aeroportu internasionál Comoro, otél sira tenke padraun internasionál, rede internet tenke lais no seguru inklui iha kapasidade simu bainaka barak bainhira sai uma-na’in ba reuniaun nível a’as sira.
Jornalista : Antónia Gusmão
Editora : Julia Chatarina
