iklan

NASIONÁL, HEADLINE, POLÍTIKA

Espesialista ASEAN no PM Xanana diskute preparasaun rekursu umanu

Espesialista ASEAN no PM Xanana diskute preparasaun rekursu umanu

Espesialista ba Dezenvolvimentu Rekursu Umanu iha ASEAN, Bob Aubrey. Imajen/Mídia GPM

DILI, 29 agostu 2023 (TATOLI)-Espesialista ba Dezenvolvimentu Rekursu Umanu iha Asosiasaun Nasaun Sudeste Aziátiku (ASEAN, sigla inglés), Bob Aubrey, hamutuk ho delegasaun hasoru malu ho Primeiru-Ministru (PM), Kay Rala Xanana Gusmão, tersa ne’e, hodi diskute polítika no preparasaun rekursu umanu bainhira Timor-Leste sai membru plenu direitu ASEAN.

“Previléjiu no sente onradu hasoru Primeiru-Ministru Xanana. Ami ko’alia kona-ba dezenvolvimentu iha nasaun ne’e, partikularmente kona-ba dezenvolvimentu rekursu umanu. Nu’udar fundadór ba organizasaun dezenvolvimentu rekursu umanu  ASEAN, hanesan organizasaun privada ou sosiedade sivíl ami hakarak kria oportunidade dezenvolvimentu rekursu umanu iha kada membru, partikularmente liga ho situasaun Timor-Leste,”  Bob Aubrey hateten hafoin hasoru malu ho Xanana Gusmão, iha Palásiu Governu.

Notísia relevante : Espesialista apoia Timor-Leste ezije ASEAN restaura demokrásia iha Myanmar

Bob Aubrey rekomenda Governu atu prepara didi’ak rekursu umanu, apreende hosi nasaun membru ASEAN hodi bele prepara-an di’ak liután simu buat hotu ne’ebé asosiasaun sei oferese ba Timor-Leste.

Biban hanesan, Xefe Ezekutivu husu espesialista atu fahe esperiénsia ba membru Governu hotu.

“Primeiru-Ministru husu atu fahe esperiénsia ba membru Governu tomak liuhosi semináriu ne’ebé Governu Timor-Leste sei prepara iha tempu badak,” nia akresenta.

Bob Aubrey hasoru Xefe Governu akompaña hosi Ministru Prezidénsia Konsellu Ministru, Agio Pereira no Vise-Ministra ba Asuntu ASEAN, Milena Rangel.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!