iklan

NASIONÁL, HEADLINE, POLÍTIKA

Governu rekolla hela dadus hodi halo auditoria ba projetu

Governu rekolla hela dadus hodi halo auditoria ba projetu

Primeiru-Ministru, Kay Rala Xanana Gusmão. Imajen Tatoli/Egas Cristóvão

DILI, 31 agostu 2023 (TATOLI)—Prezidente Repúblika (PR), José Ramos Horta, husu tuir promesa IX Governu ba loron 120, iha ámbitu reuniaun semanál ho Primeiru-Ministru (PM), Kay Rala Xanana Gusmão.

Xefe Governu haktuir, durante reuniaun Xefe Estadu kompromisu Governu halo auditoria ba projetu sira ne’ebé Governu anteriór selebra iha ona mandatu ikus.

“Prezidente Repúblika husu imi dehan halo auditoria, ne’ebé ha’u dehan agora ami buka atu rekolla dadus, ne’ebé ami haree katak instituisaun sira kaer justisa, haree kona-ba lei iha tinan hirak ne’e la halo buat ida ho sentidu katak la fó apoiu ba kumprimentu lei. Tanba buat barak halo viola norma no viola lei ema ida la ko’alia ne’ebé ami sei rekolla tan dadus, membru Governu sira mós iha dadus barak tebes,” Xanana hateten hafoin reuniaun semanál ho Xefe Estadu, iha Palásiu Prezidensiál, Bairru Pité, kinta ne’e.

Aleinde ne’e, iha diskursu tomada pose IX Governu nian, iha loron 01 juñu 2023, Xanana promete katak atu halo auditoria ba projetu sira ne’ebé deskonfia lori prejuizu ba Estadu, hanesan projetu Ró Haksolok, projetu Uma Kbiit Laek (UKL) ne’ebé ikus mai nakfilak ba Uma Naroman ba Povu (UNP), Cesta Bázika, Fundu COVID-19 no seluk tan.

Notísia relevante : MOP planeia forma ekipa verifika projetu ne’ebé lansa ona

Ba kestaun ne’e, Xanana dehan daudaun ne’e IX Governu Konstitusionál sei halibur dadus hosi ministériu hotu inklui setór justisa molok halo auditória hodi hatuur buat hotu tuir lei molok pronúnsia ba públiku.

Tuir Xefe Ezekutivu, bainhira IX Governubuka tuir kona-ba projetu UNP, la refleta iha programa VIII Governu nian no zinku ka UKL+ ne’e Governu lori ba rai de’it iha suku no la hatene atu entrega ba sé.

“Afinál osan ne’e fó ba suku sira, depois mak fó tan ita la hatene nia ezekusaun todan tebes, maibé ne’e la buat ida, ami tenke kurije, ami mai atu kurije ho di’ak nomós distribuisaun sira ne’ebé lori zinku atus ba atus soe hela iha ne’ebá, buat ne’e to’o se nia uma, sé mak simu, buat sira ne’e hotu,” Xanana lamenta.

Ho irregularidade sira ne’e, Xefe Governu relata ba Prezidente Repúblika no antes mós relata ba Parlamentu Nasionál katak, IX Governu la’ós atu lori ema ida ba kadeia maibé atu haloos buat sira ne’ebé implementa la tuir lei.

“Hakarak de’it fó hatene ba povu tomak, ami sei hasai, divulga buat sira ne’e hotu ba povu tomak hodi iha futuru sé mak ba kaer Governu, sé mak kaer ukun labele halo hanesan ne’e tan,” nia tenik

Iha sorin seluk, Xefe Estadu kompriende difikuldade sira hotu, nune’e husu halo nafatin tanba ho difikuldade sira ne’e mak Governu sei haree katak tempu atu haree tinan fiskál prepara orsamentu 2024, maibé promete ona iha Parlamentu Nasionál katak alterasaun lei Tributária no Enkuadramentu Orsamentál (LEO), temi ona iha proposta lei orsamentu ezekutivu nian sei diskute fali iha Parlamentu Nasionál antes hatama orsamentu iha ne’ebá.

Durante reuniaun semanál ne’e, PR Horta mós fó hanoin nafatin ba Xefe Ezekutivu atu haree didi’ak kriasaun Institutu Públiku (I.P) no Empreza Públiku (E.P), ne’ebé ninia líder sira simu saláriu boot maibé laiha produtividade serbisu no halo despeza boot ba Estadu. Ho ida-ne’e Xanana subliña katak, IX Governu Konstituisionál sei haree hela orgánika ministériu sira tanba iha mudansa.

“Ko’alia mós kona-ba problema barak ne’ebé ami sei enfrenta, Xefe Estadu bolu atensaun mós bá iha I.P no E.P sira barbarak ho saláriu boot tebes, la halo buat ida,” Xanana salienta.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!