MAE realiza formasaun sistema jestaun arkivu iha Bobonaro
MALIANA, 31 agostu 2023 (TATOLI)-Ministériu Administrasaun Estatál (MAE) realiza formasaun kona-bá sistema jestaun uniformiza arkivu no arkivu vitál ba funsionáriu sira iha munisípiu Bobonaro.
Diretór Nasionál Jestaun Dokumentál Sistema Arkivu MAE, Nazario dos Reis Freitas, esplika, formasaun ne’e hahú iha segunda loron 28 fulan agostu to’o sesta loron 01 fulan outubru tinan ne’e.
Objetivu realiza formasaun ne’e atu uniformiza sistema klasifikasaun dokumentu hosi instituisaun idak-idak núne’e ne’ebé eziste iha munisípiu ne’e.
“Matéria ne’ebé mak ita fó kona-bá arkivu korente no arkivu vitál, formasaun ida-ne’e úniku, tékniku oituan relasaun ho simu karta ne’ebé mak tama no sai no oinsá ita arkiva iha fatin ne’ebé mak loloos hodi núne’e fasilita superiór sira asesu,” nia informa ba Jornalista sira, iha Maliana.
Nia espera formasaun ne’e partisipante sira bele implementa iha idak-idak nia servisu fatin hodi armoniza sistema administrasaun iha munisípiu Bobonaro.
Enkuantu formasaun ne’e núdar planu anuál MAE nia ne’ebé tinan ne’e implementa iha munisípiu Bobonaro, Viqueque, Covalima no munisípiu seluk sei realiza iha tinan oin ho programa ne’ebé la hanesan.
Notísia relevante: PN aprova OR 2023 ba MAE $52.764.796 iha espesialidade
Jornalista: Sérgio da Cruz
Editór: Evaristo Soares Martins
