DILI, 31 agostu 2023 (TATOLI)—Prezidente Parlamentu Nasionál, Maria Fernanda Lay, hala’o reuniaun kortejia ho nia omólogu Prezidente Assembleia Nasionál São Tomé e Príncipe, Celmira Sacramento, hodi ko’alia kona-ba problema kampu serbisu ne’ebé nasaun rua ne’e hasoru ligadu ho tema prinsipál ne’ebé foti iha reuniaun simeira CPLP ba dala-XIV kona-ba “Juventude Sustentabilidade”.
Notísia Relevante: PPN sei reprezenta PR partisipa simeira CPLP iha São Tome e Principe
“Enkontru kortejia aproveita oportunidade mai to’o ona iha São Tomé, ami ko’alia pontu rua liga ho tema ne’ebé ko’alia horisehik liga ho juventude sustentabilidade, ne’ebé ita mós iha problema ho kampu de traballu ne’ebé ita-nia mós sai ba rai-li’ur. Sira mós hanesan maibé la preparadu, ida-ne’e mak ita preokupa,” Prezidente PN, Maria Fernanda Lay, hateten liuhosi komunikadu imprensa ne’ebé Agéncia Tatoli asesu, kinta ne’e.
Enkontru ne’e hala’o iha edifísiu Prezidente Assembleia Nasionál São Tome Príncipe no iha reuniaun ne’e parte rua konkorda atu iha estabelese kooperasaun entre Timor-Leste ho São Tomé e Príncipe, nune’e bele haruka joven timoroan sira mak tuir formasaun kona-ba turizmu no gastronomia, nune’e bele hasa’e kapasidade joven sira-nian iha área rua ne’e.
Prezidente Parlamentu Nasionál Timor Leste, propoin atu hetan apoiu hosi São Tomé e Príncipe kona-ba futuru reuniaun UIP nian, nune’e Portugés bele sai lian servisu nian iha UIP no la presiza halo tradusaun bainhira ko’alia ho lian refere.
Aleinde ne’e, durante enkontru, sira ko’alia mós kona-ba kooperasaun entre Parlamentu Nasionál Timor-Leste ho Assembleia Nasionál São Tomé e Príncipe nian, atu bele iha interkámbiu entre deputadu sira hosi nasaun rua, tanba Timor forma ona grupu amizade ho São Tomé e Príncipe.
Jornalista : Nelson de Sousa
Editór : Cancio Ximenes
