DILI, 31 agostu 2023 (TATOLI)–Primeiru-Ministru (PM), Kay Rala Xanana Gusmão, konsidera desizaun junta militár Myanmar expulsa Enkarregadu Negósiu timor-oan, Avelino Fernandes Ximenes Pereira, la fó impaktu ba Timor-Leste sai membru plenu direitu Asosiasaun Nasaun Sudeste Aziátiku (ASEAN, sigla inglés).
“Hasai ita-nia ema sira hosi Myanmar la fó impaktu ba ita atu tama ASEAN tanba ASEAN la’ós Myanmar maibé Myanmar parte ida hosi ASEAN,” PM Xanana hateten hafoin reuniaun semanál ho Xefe Estadu, iha Palásiu Prezidensiál, iha Bairru Pite, kinta ne’e.
Notísia relevante : PM Xanana husu líder membru ASEAN fó solusaun ba problema Myanmar
Xefe Governu dehan, razaun seluk ho hanoin katak Timor-Leste sai nu’udar membru fundadór g7+, ne’ebé hanesan organizasaun inter-governamentál ne’ebé tau-matan ba Estadu frájil, hanesan mós Timor-Leste. Organizasaun ne’e akumula ona país 20 ne’ebé hetan estatutu hanesan observadór permanente iha Organizasaun Nasaun Unida (ONU) hodi ko’alia iha ONU kona-ba medida apoia, la’ós ba hanorin maibé ajuda ko’alia ho komunidade internasionál kona-ba harii Estadu.
“Tanba ida-ne’e mak la fó impaktu, ita (Timor) ajuda hela país barak tebes iha kontinente Áfrika ne’ebé Estadu laiha. Ezemplu maka Guiné-Bissau nu’udar Estadu ida ukun-an iha tinan 1974, iha tinan 2014 halo tinan 40 mak foin Timor-Leste ukun-an tinan 12 de’it ba ajuda halo eleisaun dahuluk. Sira iha golpe Estadu hamutu dala-30, ha’u ba hasoru jenerál fitun haat ida hakerek no lee la hatene,” nia esplika.
Jornalista : Antónia Gusmão
Editora : Julia Chatarina
