Autoridade RAEOA hahú diskute preparasaun eleisaun suku
OÉ-CUSSE, 01 setembru 2023 (TATOLI – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bnao, sesta ne’e halo enkontru koordenasaun ho membru autoridade sira kona-bá preparasaun apoia autoridade nian ba iha eleisaun suku.
“Ohin ita enkontru atu konvoka kona-bá autoridade nia preparasaun ba eleisaun suku ne’e oinsa, tanba iha lei númeru 09/2016, hateten, mandatu órgaun xefe suku sira, kada tinan hitu halo fali eleisaun, tanba sira-nia mandatu sei remata iha outubru ne’e, entaun ohin ita koordena ho sekretáriu hotu-hotu atu rona sira-nia sujestaun no rekomendasaun ne’e, atu eleisaun ne’e bele la’o ho susesu,”Arsénio Paixão Bano, ba Tatoli iha Oé-Cusse.
Notísia relevante: CNE Oé-Cusse marka ona ajenda atu realiza edukasaun sívika iha Pássabe
Arsénio Paixão Bano informa, antes ne’e Guverno liuhosi Konsellu Ministru aprova ona data eleisaun suku sei akontese iha loron 28 outubru 2023, entaun autoridade mós simu ona rekomendasaun hosi parte STAE Oé-Cusse husu atu apoia hanesan eleisaun sira liuba.
“Ohin ne’e ita konkorda ho desizaun ida katak, apoiu ba infraestrutura báziku sira hanesan dalan sira tenki asesu ba sentru votasaun sira, ita mós sei apoiu transporte ba STAE atu tula sasán sira, inklui apoia mós kona-bá saneamentu, eletrisidade, no fasilidade públiku sira seluk,” nia katak.
Tuir nia, eletrisidade iha Oé-Cusse kuaxze 97% tama ona iha fatin hot-hotu, balu hetan solar panel, maibá karik iha sentru votasaun balu, la asesu, téknku hosi EDTL sei preparadu atu halo intervensaun.
Nune’e mós parte Diresaun Rejionál Infraestrutura kontinua identifika estrada rurál sira-ne’ebé sei aat, sei halo manutensaun hodi fasilita transporte sira tula materiál eleisaun suku la’o ho di’ak.
Notísia relevante: MAE konsulta Autoridade RAEOA bá progresu ezekusaun PNDS no eleisaun suk
Jornalista: Abílio Elo Nini
Editór: Evaristo Soares Martins
