Governu bele halo avaliasaun ba I.P ho E.P
DILI, 01 setembru 2023 (TATOLI)—Vise bankada CNRT iha Parlamentu Nasionál (PN), Deputadu Patrocino Fernandes, hateten Governu bele halo avaliasaun kle’an ba instituisaun Estadu Institutu Públiku (I.P) ho Empreza Públika (E.P) ne’ebé manán saláriu boot, maibé laiha produtividade tanba la rekolla reseita ba kofre Estatu.
Notísia Relevante: Governu sei reforma I.P ho E.P ne’ebé ho tabela salariál boot
Atu halakon ka mantein I.P ho E.P, nia hateten, IX Governu Konstitusionál ne’e kontinuidade foin simu pose a no Orsamentu Retifikativu seidauk promulga no promulga tama ona vigór Governu foin hahú halo ezekusaun.
“Ne’ebé, hanoin foin fulan tolu, hanoin defísil tebes para Governu halo ona avaliasaun ida kle’an, justifika duni instituisaun sira-ne’e la serve atu hamrik no justifika duni instituisaun sira-ne’e tenke halakon, presiza tempu hodi halo avaliasaun. Entaun, nu’udar bankada Governu, ami tau nafatin konfiansa ba Governu para bele haree di’ak buat sira-ne’e hotu bele hola desizaun,” Deputadu Patrocínio Fernandes hateten ba ba jornalista sira iha PN, sesta ne’e.
Iha reuniaun semanál Prezidente Repúblika (PR) ho Primeiru-Ministru, PR mós fó hanoin nafatin atu haree didi’ak kriasaun I.P ho E.P ne’ebé ninia líder sira simu saláriu boot maibé laiha produtividade serbisu no halo despeza boot ba Estadu.
“Hanoin, ita iha órgaun soberania haat ne’e indepedente ida-idak iha separasaun podér, maibé interdepedénsia ba malu, Prezidénsia Repúblika, PN, Governu no Tribunál mós. Observasaun Prezidente Repúblika nu’udar órgaun soberania ida mós iha ninia ligasaun serbisu ho Governu, agora hosi Parlamentu sei haree fó apoiu ba polítika Governu ne’ebé atu halakon I.P ka E.P no hosik existe nafatin ne’e husik ne’e kompeténsia Governu nian,” nia hateten.
Tanba, nia hateten, Governu mak iha kompeténsia ba polítika jestaun Estadu tomak, entaun depende ba Governu halakon I.P no E.P sira mak iha vantajen liu ba povu dezenvolvimentu nasaun nian Governu sei haree, em prinsípiu Parlamentu Nasionál liuliu bankada ne’ebé iha obrigasaun atu viabiliza Governu ne’e sei haree la’ós haree apoiu de’it.
“Maibé se haree Governu nia polítika ne’e bele justifika ho razaun sira ne’ebé lójika no ema hotu simu lori benefísiu ba povu, hanoin PN sei hola ninia pozisaun,” nia dehan.
Tan ne’e observasaun PR no sei fila ba Governu sei haree kaer hanesan referénsia hodi tetu no haree liu tan.
Jornalista : Nelson de Sousa
Editór : Cancio Ximenes
