Governu la kontra lei submete proposta OJE 2024 iha 15 novembru
DILI, 01 setembru 2023 (TATOLI)—Prezidente komisaun C trata asuntu Finansa Públika iha Parlamentu Nasionál (PN), Cedelizia dos Santos, hateten tuir planu Governu sei submete proposta lei Orsamentu Jerál Estadu (OJE) 2024 mai iha PN iha 15 novembru, ida-ne’e Governu la kontra lei.
Nia hateten, se iha Lei Enkuadramentu Orsamentál (LEO) previstu katak iha 01 outubru Governu tenke haruka proposta OJE mai Parlamentu Nasionál, ida-ne’e dehan kuandu ano normál, agora iha debate orsamentu retifikativu halo mós alterasaun iha LEO artigu 52 hosi pontu rua, ne’ebé hateten se Governu ne’e foun, ezemplu IX Governu foin tomada pose iha 01 juñu, nia iha tempu fulan lima bele submete mai PN.
‘’Se ita dehan Governu toma pose iha 01 juñu, entaun ita konta hosi ne’e mai oin ne’e, fulan lima prinxe hela kriteira. Lei ne’ebé mak foin dadaun altera tiha ona, entaun kuandu sira submete mai iha 15 novembru, ne’e la kontra lei, tanba altera tiha ona artigu 52 iha LEO,” Prezidente Komisaun C, Deputada Cedelizia dos Santos, hateten ba jornalista sira iha uma fukun Parlamentu Nasionál.
Nune’e diskusaun ba proposta OJE 2024 ho tempu badak maibé iha koordenasaun PN ho Governu sei halo diskusaun lao ho di’ak, tanba tempu hosi fulan novembru ba dezembru tenke aprova ona proposta Orsamentu Jerál Estadu (OJE) 2024.
“Hanoin tempu ne’e badak, ita iha liña koordenasaun di’ak Parlamentu ho Governu, prosesu sira ne’e laiha problema mai Parlamentu. Ami komisaun C hanoin katak, normalmente loron 10 hanesan ne’e ita bele halo audiénsia públika, hafoin diskusaun faze jeneralidade no espesialidade, se laiha proposta barak liu bele lala’is ninia prosesu,” nia hateten.
Notisia Relevante: https://tatoli.tl/2023/08/29/konsellu-ministru-determina-lina-ministerial-finaliza-proposta-orsamental-too-29-setembru/
Jornalista : Nelson de Sousa
Editór : Cancio Ximenes
