DILI, 01 setembru 2023 (TATOLI)-Governu liuhosi Vise-Primeiru Ministru, Ministru Koordenadór Asuntu Sosiál no Ministru Dezenvolvimentu Rurál no Habitasaun, Mariano Assanami Sabino, sesta ne’e, halo ona lansamentu ba atividade jestaun lixu, iha Eskola Bázika Centrál (EBC-sigla portugés), 30 de agostu, Comoro.
Korea Organisation International Coperation Agency (KOICA) no Alumni Assosiation of Timor-Leste (KAATL) maka organiza atividade ne’e, ho ninia tema maka “Importansia jestaun lixu ho prinsipiu 5R, Refuse, Reduce Reuse, Recycle, Rot,” nune’e bele introdúz ba estudante sira atu oinsá jere rasik lixu iha sira-nia eskola no uma.
Assanami reprezenta Governu Konstitusionál dasia hato’o agradesimentu ba KOICA ne’ebé fó ona oportunidade ba Timoroan bá estuda iha Korea, no ohin fila mai Timor-Leste hodi tulun governu atu dezenvolve nasaun ne’e.
“Ha’u husu ba Alumni KOICA sira se bele atividade hanesan ne’e ba mós eskola sira seluk,” dehan Vise-Primeiru Ministru ne’e, iha Eskola EBC 30 de agostu Comoro Dili.
Atu kuidadu ambiente ne’ebé moos no seguru la’ós de’it kestaun soe lixu arbiru maibé tuir nia haree kazu ida seluk maka sunu rai no tesi ai-arbiru. Tanba ne’e, husu atu kuda ai-horis iha rai ne’ebé sei mamuk nune’e bele haburas ambiente ida matak ba Timor-Leste.
Nune’e persiza kuda modo, haki’ak ikan iha rai ne’ebé mamuk hodi luta hasoru problema má nutrisaun, no raes badak ne’ebé daudaun Timor-Leste ninia persentajen 47 (%). Fatór falta bee moos no konsumu hahán ne’ebé la ijieñe, kontribui ba problema má nutrisaun no raes badak.
Tanba ne’e, governu sei orienta Bee Timor Leste, Empreza Públika (BTL,EP)atu dezenvolve kanalizasaun bee moos bá to’o populasaun nia uma, jardím no fatin públiku sira.
Nia relata atu dezenvolve área bee moos maka governu impresta osan husi Banku Dezenvolvimentu Aziatíku (ADB,sigla inglés) no doadores sira seluk, inklui MCA-TL,I.P moos apoiu osan millaun $420 hodi dezenvolve bee moos iha Dili parte postu administrativu Dom Aleixo no kapitál munisípiu sira seluk.
Prezidente Alumni Assosiation of Timor-Leste, Ferderick Nelson Mandela Lopes, observa kestaun jestaun lixu iha Timor-Leste sei sai difikuldade boot ba Autoridade no komunidade sira, tanba ne’e persiza halo sosializasaun informasaun ba estudante no komunidade sira oinsá atu jere lixu ne’ebé prodúz iha eskola no uma ida-idak.
“Se ita so’e lixu arbiru ita-nia ambiente sei hetan estragus, no ita sei hemu bee ne’ebé fo’er, tanba ne’e mak ami oferese filtru-bee ba eskola ita sei ense bee husi torneira minutu 30 hanesan ne’e, estudante sira bele lori kantíl ne’ebé ami fahe ba ense hodi hemu,” Ferderick hateten.
Lansamentu jestaun lixu iha Eskola Bázika Sentrál (EBC) ne’e hanesan projetu pilotu ne’ebé organiza husi KOICA no Alumni Assosiation of Timor-Leste (KAATL) tanba ne’e, tuir planu sei implementa mós iha eskola sira seluk iha futuru.
Jornalista: Hortencio Sanchez
Editór : Agapito dos Santos
