DILI, 01 setembru 2023 (TATOLI)-Vise Primeiru-Ministru no Ministru Dezenvolvimentu Rurál no Habitasaun Komunitária, Mariano Assanami Sabino, sesta ne’e, hasoru malu ho Xefe Komisaun ba Kooperasaun Parlamentár DPR-RI, Fadli Zon, hodi fahe esperénsia ba malu kona-ba modelu dezenvolvimentu rurál ne’ebé maka di’ak atu Timor-Leste implementa iha futuru.
“Ami ko’alia kona-ba modelu dezenvolvimentu rurál ne’ebé la’o iha Indonézia, ko’alia mós kona-ba habitasaun,”Assanami hateten ba jornalista sira hafoin hasoru malu ho delegasaun hosi Indonézia ne’e iha Palásiu Governu Dili.
Notísia Relevante :PN TL-PN Indonézia hala’o kooperasaun iha área mídia-protokolu parlamentár
Governu dasia liuhosi Ministru Dezenvolvimentu Rurál no Habitasaun Komunitária sei haree fila-fali polítika dezenvolvimentu rurál iha tinan 2007 liubá liga ho implementasaun uma Millennium Development Goals (MDGs) ne’ebé konstrui ona kuaze 5000, no sei haree mós kona-ba polítika Uma Naroman ba Povu nune’e bele junta hamutuk atu dezeña di’ak liután hodi fó benefisíu ba povu.
Assanami dehan, ko’alia kona-ba habitasaun ida di’ak ba populasaun sira, save importante ida mós maka tenke kompleta ho sentru saúde no fasilidade saúde, hari’i fasilidade edukasaun ba estudante sira, no fatin halimar ba labarik sira.
Maibe, antes atu implementa polítika ne’e, Governu sei halo levantamentu dadus hahú hosi nivél baze, sei halo mós liña koordenasaun ho Ministériu Planeamentu Investimentu Estratéjiku (MPIE) no Ministériu seluk tan atu nune’e bele hetan dadus ne’ebé loos hodi implementa durante mandatu Governu Konstituisaun da sia, hahú 2024 to’o 2028.
“Agora ita ho MPIE mak ordena hela territóriu sira ne’e para hamosu sidade foun sira iha nivél kra’ik no sidade tuan ne’ebé iha ona ita tenke koordena para fó seguru ba ema hotu,” nia dehan.
Iha fatin hanesan, Xefe Komisaun ba Kooperasaun Parlamentár DPR-RI, Fadli Zon hateten dezenvolvimentu rurál importante tebes atu dezenvolve hodi halo habitasaun ne’ebé dignu ba komunidade sira.
“Dezenvolvimentu rurál ne’e importante tebes, ita tenke hahú dezenvolve hosi suku no aldeia halo habitasaun ida ne’ebé mak di’ak, Indonézia prontu apoiu Timor-Leste bainhira presiza ami-nia tulun iha dezenvolvimentu rurál ninian,” Fadli Zon, hateten.
Antes ne’e, Timor-Leste no Indonézia estabelese ona kooperasaun iha área edukasaun, saúde, juventude desportu, dezenvolvimentu iha lina fronteira, agrikultura no seluk tan, tanba ne’e, ba futuru, Fadli Zon suzere atu nasaun rua foku iha ninia implementasaun.
Jornalista: Hortencio Sanchez
Editór : Agapito dos Santos
