Autoridade RAEOA extende tan feira produtu lokál ba loron-haat
OÉ-CUSSE, 02 setembru 2023 (TATOLI) – Autoridade Rejiaun administrativa Espesiál Oé-Cusse Ambeno (RAEOA) extende tan feira produtu lokál ba loron-haat, hahú 01 to’o 04 setembru, iha ámbitu komemorasaun loron istóriku.
Sekretáriu Rejionál ba Asuntu Komérsiu no indústria, Pedro da Silva Boquifai, informa, komemorasaun loron FALINTIL (20 agostu 1975) no loron Konsulta Populár (30 agostu 1999) ba dala-24 iha Oé-Cusse durante loron 21, hahú iha loron 10 to’o 31 agostu 2023.
“Maibé autoridade simu rekomendasaun hosi ita-nia veteranu sira, katak persiza aumenta tan ba loron-haat, tanba loron Konsulta Populár nia puncak loloos iha loron 04 setembru, ne’e kona-ba anúnsia rezultadu votasaun iha altura ne’ebá, entaun ita extende hodi konta ita-nia istória ne’e ho loloos,” Pedro da Silva, hateten ba Agência Tatoli iha Oé-cusse, sábadu ne’e.
Notísia relevante: RAEOA abertura feira sirkula ekonomia no promove produtu lokál durante loron 21
Durante feira produtu lokál iha atividade sia, hanesan kompetisaun solu vokál, homan, soru-tais, mellora stand, ikon RAEOA, gastronomia, nata krupuk, kompetisaun halai karong, no atividade jogu tradisionál sira hanesan bola-guling, kuru-kuru, futu-manu no kere-kere.
Atividade hirak ne’e hala’o hosi grupu 12 ne’ebé mai hosi diresaun no instituisaun sira hanesan sekretáriu rejionál, Gabinete Prezidente Autoridade, envolve mós grupu mikro-pequena empreza, emprezáriu, grupu kooperativa, grupu agrikultura, banku, ajénsia internasionál, ONG lokál, instuisaun relijioza, UNDP inklui komunidade hosi sub-rejiaun haat.
“Partisipante sira-ne’e ita sei fornese prémiu, tanba durante iha feira ne’e iha komisaun ida ne’ebé halo avaliasaun ba sira-nia produtu no fatin promosaun produtu sira, tanba feira ne’e autoridade aloka rihun $13 ba atividade hotu-hotu,” nia tenik.
Notísia relevante: PNTL la tolera kualkér individu tenta kria instabilidade iha feira Oé-Cusse
Jornalista : Abílio Elo Nini
Editora : Julia Chatarina
