DILI, 02 setembru 2023 (TATOLI)—Empreza privada, PAX Cleaning Service serbisu hamutuk ho Cruz Vermelha de Timor-Leste (CVTL) no Banco de Sangue Hospital Nacional Guido Valedares (HNGV), sábadu ne’e, realiza doasaun ran iha ámbitu komemora aniversáriu ba dala-13.
“Iha atividade ohin, ámbitu tinan 13 PAX nian, ne’ebé ami komemora horiseik 01 setembru, ida-ne’e faze daruak, faze dahuluk ami halo semana kotuk ho ema na’in-60, no ohin mós hanesan halo doasaun ran hosi ema na’in-60 ba ita-nia maluk sira ne’ebé presiza, tanba objetivu primeiru mak ran turuk ida hosi maluk sira ne’ebé fó bele salva ita-nia maluk sira ne’ebé presiza, no segundu mak hosi maluk sira ne’ebé fó ran bele deteta moras saida mak sira iha,” Administradór PAX, Rui Manuel da Costa Rangel, hateten iha edifísiu PAX, Taibessi.
Notísia relevante : HNGV halo semináriu hodi selebra loron mundiál doasaun ran
Iha biban hanesan, traballadora PAX, Margarida dos Santos, hateten, hakarak halo doasaun ran hodi bele tulun família sira ne’ebé presiza.
Nune’e mós, Jestór programa doasaun ran hosi CVTL, Jacinto Luís, agradese ba PAX tamba ho koordenasaun ne’ebé la’o ho di’ak, ikus mai iha inisiativa halo atividade doasaun ran. CVTL sai parseiru di’ak ho HNGV liuhosi Departamentu Banco de Sangue, no parte CVTL nia serbisu mak halo mobilizasaun no sensibiliza ba komunidade kona-ba benefísiu doasaun ran, nune’e liuhosi atividade doasaun ne’e bele apoiu ran ba banco de sangue hodi bele oferese filafali ba pasiente sira ne’ebé presiza ran.
Tuir nia, difikuldade ne’ebé Banco de Sangue hasoru maka doadór voluntáriu permanente ka regulár seidauk sufisiente.
“Iha duni maibé ho volume kiik no durante ne’e kazu ne’ebé hasoru mak pasiente ne’ebé presiza ran barak liu. Entaun hosi atividade ne’e, CVTL nafatin fó informasaun atu oferese ran voluntáriu ba Banco de Sangue hodi atende pasiente ne’ebé presiza,” Jestór programa tenik.
Aleinde ne’e, nia apela ba populasaun hotu ho idade 18 to’o 60 atubele fó ran voluntáriu hodi bele tulun maluk seluk ne’ebé presiza.
Jornalista : Nelson de Sousa
Editora : Julia Chatarina
