Eskola ESJ 04 setembru Viqueque komemora loron istóriku
VIQUEQUE, 04 setembru 2023 (TATOLI)—Profesór no estudante Eskola Ensinu Sekundáriu Jerál (ESJ) 04 Setembru Viqueque, segunda ne’e, ho inisiativa komemora loron rona rezultadu eleisaun (04 setembru 1999) ukun rasik-an, ho misa agradesimentu no kari ai-funan ba eroi no martir sira iha munisípiu Viqueque.
Adjuntu Diretór Eskola ESJ 04 setembru Viqueque, Hélio Faria Guterres, konsidera, komemorasaun loron ne’e importante ba foin-sae sira.
“Kada tinan ami sempre komemora maski ho atividade kiik maibé ami hakarak realiza hodi ita hanoin hikas ba momentu ne’ebá ita rona rezultadu votasaun ne’ebé ita halo iha loron 30 agostu 1999. Nune’e ita konsidera importante ba ita timor-oan sira tanba deside destinu nasaun ida-ne’e sai independente. Tanba ne’e ami mós halo misa agradesimentu no kari ai-funan iha krús boot semitériu Viqueque hodi fó odra ba eroi sira,” Adjuntu Diretór informa ba agência Tatoli, via telefónika, segunda ne’e.
Notísia relevante : Rezultadu konsulta populár sai loron reflesaun ba futuru
Aleinde ne’e, estudante sira konsidera loron ne’e importante ba povu no nasaun Timor-Leste.
“Molok tama ba eleisaun 30 agostu 1999, ita-nia maluk barak mak mate no balun hetan torturasaun, maibé ikus mai ita konsege hetan libertasaun ida-ne’e liuhosi prosesu ne’ebé naruk nia laran. Tanba ne’e sai istória ida ba ita hotu hodi relembra hikas,” nia hato’o.
Aleinde ne’e, parte eskola realiza kompetisaun tein produtu lokál ba estudante sira hodi festeza loron istóriku no promove produtu lokál. Nune’e mós, loke kompetisaun jogu futsál entre estudante.
Jornalista : Vitorino Lopes da Costa
Editora : Julia Chatarina
