iklan

EDUKASAUN, ERMERA, HEADLINE

ETCI hakarak halo peskiza kona-ba produsaun kafé Timór

ETCI hakarak halo peskiza kona-ba produsaun kafé Timór

Plantasaun Kafé iha Munsípiu Ainaro, domingu (15/05). Imajen Tatoli/Francisco Sony

DILI, 04 setembru 2023 (TATOLI) – Mudansa klimátika afeta tebes ba produsaun kafé iha rai-laran, tanba kada tinan tun ba 10%, nune’e East Timor Coffee Institute (ETCI) hakarak halo peskiza ida hodi bele ajuda Governu atu halo investimentu ba kafé Timór.

Mateus Maia de Jesus, reitór ETCI hatete polítika institutu nian mak atu ajuda Ezekutivu hodi hadi’a kualidade kafé Timór liuhusi dalan peskiza. Tanba ho ida ne’e maka sei apoia Estadu atubele deskobre fatór sira ne’ebé maka afeta ba produsaun kafé.

“Agora daudaun produsaun kafé Timór kada tinan hahú menus tebes ne’ebé tun kuaze 10%. Ne’e tanba problema husi mudansa klimátika inklui la hetan atensaun maka’as husi Governu”, Mateus de Jesus afirma via telefone.

Nia dehan bainhira Timor-Leste hakarak hetan produsaun kafé ho kualidade di’ak maka tenke kuda foun fali, tanba kafé ne’ebé moris daudaun ne’e liu ona tinan 25 no balun to’o 40, signifika kafé sira ne’e labele prodús ona kualidade no kuantidade.

Pekiza ne’e ba daneen no sei halo iha 2024 ne’ebé foka liu ba produsaun kafé. Matéria hotu ETCI halibur ona no sei  prevee rihun $50-resin ba investigasaun sientífika ne’e.

Peskiza ne’e sei lori tempu tinan ida no nia rezultadu sei públika iha jornál sientífiku ka internasionál no sei submete mós ba ministériu relevante sira, nune’e bele ajuda Governu iha planu sira.

Tuir dadus ne’ebe maka ETCI rekolla entre 2017 no 2021, kafé Timór nia kualidade di’ak maibé produsaun maka menus. Iha 2022 no 2023, dadus hatudu katak produsaun kafé Timór tun ona ba 10%.

Ho kestaun ne’e maka ETCI iha ona nia polítika rasik hodi halo fali peskiza sientífika sobre produsaun kafé atu halibur fali dadus katak kafé ne’ebé agrikultór sira kuda ne’e nafatin iha kualidade ka menus ona. Husi ne’e maka ETCI bele rekomenda ba Governu atu halo nia papél hodi hadi’a polítika dezenvolvimentu kafé nian ba futuru.

“Governu hakarak halo investimentu ida boot, polítika di’ak liu maka labele haree ba sistema reabilitasaun kafé, maibé oinsá tenke iha polítika ida atu kuda foun fali kafé sira iha rai sira ne’ebé sei mamuk no kategoria produtivu hela. Governu presiza investe maka’as iha setór ne’e, tanba produtu ne’e atu reforsa ekonomia Timor-Leste nian”, salienta.

Notísia relevante: CCT reabilita ona kafé ektare 200 iha Ermera

Jornalista: Tomé Amado 

Editora: Maria Auxiliadora

iklan
iklan

Leave a Reply

iklan
error: Content is protected !!