iklan

ERMERA

Feto potensiál Poetete sei kompete sai xefe suku

Feto potensiál Poetete sei kompete sai xefe suku

Xefe Suku Poetete, postu administrativu Ermera Vila, munisípiu Ermera, Felisberto das Neves. Imajen Tatoli/Osória Marques.

ERMERA, 04 setembru 2023 (TATOLI)—Xefe Suku Poetete, postu administrativu Ermera Vila, munisípiu Ermera, Felisberto das Neves, hateten eleisaun suku tinan ne’e nakloke ba ema hotu inklui ba feto poténsiál no ema ho defisiénsia (EhD) sira, nune’e ba sé de’it mak liu iha eleisaun suku 2023 ne’e sei servisu hamutuk hodi lori dezenvolvimentu suku ne’e to’o iha baze.

Notísia Relevante: Tomas Cabral: “Loron 120 nia laran poder lokál tenke funsiona”

“Ami hein de’it informasaun hosi STAE ho CNE katak bainhira mak loke rejistu maibé daudaun ne’e ami preparadu hodi kompete no iha suku Poetete ne’e rasik iha feto potensiál balun no mós ema ho defisiénsia sira sei kompete. Ha’u rasik labele kompete iha eleisaun suku tinan ne’e, tanba kondisaun saúde no ha’u nafatin kolabora ho parte hotu hodi bele realiza ita-nia eleisaun suku ho di’ak no susesu ba dezenvolvimentu ita rain liuliu ba ami-nia suku Poetete,” Xefe suku Poetete ne’e hatetn ba Agência Tatoli, iha sede suku Poetete, segunda ne’e. nia hateten.

Tanba, nia hateten, iha suku ida presiza mós partisipasaun feto nian tanba feto ho mane hamutuk mak lori dezenvolvimentu to’o baze.

“Tanba ne’e, husu ba joven feto no inan-feton katak labele tauk kompete maibé tenke aten-brani hodi hatudu ba mundu katak ita feto mós bele lidera hamutuk ho mane ba dezenvolvimentu suku. Atu dezenvolvimentu la’o ho di’ak presiza feto nia kontribuisaun mós no sura mós feto,” nia dehan.

Suku Poetete iha aldeia 12 kompostu hosi Loblala, Poepun, Samatrae, Tidbesi, Taklale, Biluli, Lequesi, Remata, Vila, Guagaumara, Urletoho no Urluli ho populasaun hamutuk 12.296 ho nia xefe família 2.531.

Entretantu, Xefe suku Talimoro, Luis dos Santos, hateten suku Talimoro fó prioridade ba feto hodi kompete iha eleisaun suku tinan ne’e.

“Ami Suku Talimoro kada período eleisaun suku sempre fó prioridade ba feto. Nune’e aviza hela ba maluk feto ne’ebé sente no iha interrese ami fó opurtunidade boot ba ita atu kompete iha eleisaun suku ne’ebé sei akontese iha outubru tinan ne’e,” nia dehan.

Nia hateten, daudaun ne’e autoridade komunitária hahú identifika ona kandidatura tantu feto mane ne’ebé prienxe kritériu sira ba eleisaun nian, iha ne’e presiza sidadaun timorense, kandidatura mós iha esperiénsia no mínimu sekundáriu to’o universitáriu.

Suku Talimoro iha aldeia lima (5) ho nia populasaun 4.200 no xefe família hamutuk 785.

Notísia Relevante: Eleisaun suku: CNE hahú halo edukasaun sívika ba autoridade komunitária

Jornalista : Osória Marques

EDitór        : Cancio Ximenes

iklan
iklan

Leave a Reply

iklan
error: Content is protected !!