DILI, 04 setembru 2023 (TATOLI)-Sosiedade sívil ne’ebé ho misaun halo peskiza no advokasia hodi promove dezenvolvimentu demokratiku instituisaun Estadu, atu-nune’e garante sidadaun hotu bele goza direitu ba moris seguru no livre husi violensia, Fundasaun Mahein (FM), kestiona, kapasidade Longuinhos Monteiro, ne’ebé governu nomeia lidera SNI.
Diretór FM, Nelson Belo, kestiona, kapasidade Eis-ministru Interiór, Longuinhos Rabindranatha Tagore Domingues de Castro Monteiro, nu’udar Diretór Jerál Servisu Nasionál Intelejensia (SNI) foun.
Notísia relevante:Komisaun A husu respeita prezunsaun inosénsia ba nomeasaun Longuinhos Monteiro
Tuir nia katak Longuinhos enfrenta hela prosesu legál, tanba seidauk livre hosi kazu rai arma no agora eis-Ministru Ministru hetan nomeiasaun hosi Governu hodi lidera tán SNI ne’e prezidente ladún di’ak.
“Agora kazu ida ne’e rezolve ona ga lae? legalmente rezolve ona ga lae? ida ne’e sai preukupasaun, tanba kazu ida ne’e prosesu legál ne’e seidauk. Agora nomeia tán asume kargu públiku hanesan ne’e sai presendente ladi’ak ba futuru,” líder ba instituisaun ho misaun
Tanba, tuir ezekutivu FM katak: “ema ne’ebé mak komete krimi, nia kazu la’o hela iha Tribunál maibé asumi tán kargu públiku ida ne’e sai preukupasaun ba sosiedade sívil ba povu tomak,” Nelson Belo ba TATOLI via telefônika, segunda ne’e.
Notísia relevante:TDD deside liberta totál Eis-ministru Longuinhos Monteiro
Nia dehan, Fundasaun Mahein, laiha rekomendasaun ruma atu hato’o ba Diretór Jerál SN foun.
“Ha’u la komentáriu ba desizaun polítiku. Maibé, ami preokupa mak kazu rai kilat ne’e nia prosesu to’o iha ne’ebé ona. Tanba ne’e mak ami laiha rekomendasaun,” líder ba instituisaun ho vizaun katak Instituisaun Estadu sei garante sidadaun hotu nia direitu atu moris seguru no livre husi violénsia ne’e dehan.
Enkuantu, iha loron 1 fulan setembru Primeiru-ministru, Kay Rala Xanana Gusmão, nomeia eis- Ministru Interiór, Longuinhos Rabindranatha Tagore Domingues de Castro Monteiro nu’udar Diretór Jerál SNI foun, subtitui Diretór Jerál sesante, Koronél Domingos de Câmara ‘Amico’.
Notísia relevante:Progresu serbisu Koronél Domingos de Câmara ‘Amico’ lidera SNI
Jornalista: Natalino Costa
Editór: Rafael Ximenes de A. Belo
