Grupu Zulo Unidu fó apoia nesesidade bázika ba vítima dezastre naturál
COVALIMA, 04 setembru 2023 (TATOLI)–Grupu Zulo Unidu ho inisiativa fó apoia nesesidade bázika ba vítima dezastre naturál hamutuk uma-kain 63 iha suku Zulo, postu administrativu Zumalai, munisípiu Covalima.
Notísia Relevante: Governu entrega apoiu emerjénsia ba vítima dezastre naturál iha Zulo
“Inisiativa hosi ita-nia oan no maun alin sira hosi suku Zulo iha sentimentu umanu relasiona ita-nia inan-aman sira uma-kain 63, sai vítima ba dezastre naturál tipu erosaun, tanba ne’e ami distribui nesesidade bázika,” Xefe Grupu Zulo Unidu, Alvaro Maia, hateten molok distribui nesesidade bázika ba vítima dezastre naturál iha suku Zulo Taz, segunda ne’e.
Nia hato’o agradesimentu ba intelektuál sira hosi suku Zulo, ne’ebé iha inisiativa kria grupu WhatsApp (WA) organiza malu konstribui osan hosi sidadaun Zulo-oan sira-ne’ebé servisu iha Inglatera, Austrália, Korea no mós funsionáriu púndu rekolla fundu hamutuk $2,230 hodi fó apoiu nesesidade bázika ba vítima dezastre naturál iha suku Zulo, postu Zumalai.
Intelektuál hosi suku Zulo konstribui osan hodi fó apoiu nesesidade bázika ba vítima sira, tanba hanesan intelektuál hosi suku Zulo iha sentidu solidariedade, relasiona dazastre akontese iha postu Zumalai, suku Zulo.
Nesesidade Bázika ne’ebé fó apoiu ba vítima sira-ne’e mak hanesan foos saku ida marka Folsom, kafé, taxu ida, masin-midar falun rua, mina tein Bimoli litru rua no seluk tan.
Xefe Suku Zulo, João Lopes de Carvalho, hato’o agradesementu ba intelektuál hosi grupu Zulo Unidu hala’o atividade no iha inisiativa rasik hodi fó apiu nesesidade bázika ba vítima dezastre natural.
“Ha’u agradese ba inisiativa hosi grupu Zulo unidade ne’ebé iha inisiativa hodi fó apoiu nesesidade bázika ba vítima dezastre natural iha Zulo.
Hafoin akontese dazastre naturál, iha loron 02-03 fulan-jullu 2023, iha loron 08 fulan-jullu ne’e, Sekretáriu Estadu Protesaun Sivíl fó apoiu nesesidade bázika no mós fó ona apoiu materiál rekuperasaun ba vítima dezastre naturál iha suku Zulo.
Notísia Relevante: ONG Ba Futuru anima labarik vítima dezastre naturál iha Zulo
Jornalista : Celestina Teles
Editór : Cancio Ximenes
