DILI, 04 setembru 2023 (TATOLI)—Vise bankada CNRT iha Parlamentu Nasionál (PN), Deputadu Patrocínio Fernandes, hateten Prezidente Repúblika (PR), José Ramos Horta, hala’o vizita Estadu ba rai-li’ur ne’e importante ba relasaun diplomátika ho nasaun sira seluk.
Notísia Relevante: PN autoriza PR Horta hala’o vizita Estadu ba Cuba-EUA
“Iha momentu sira-ne’e, Prezidente Repúblika ninia prezensa iha nasaun sira-ne’e importante atu fanun ka hadi’a fila-fali relasaun diplomátika ho nasaun sira seluk, hodi nune’e ita bele dada fila-fali simpatia nasaun seluk. La’ós de’it ninia implikasaun ba ita-nia relasaun diplomátika, maibé nia implikasaun ba ita-nia relasaun ekonómiku ita presiza, se ema tau konfiansa ba ita-nia rain. Tanba, sira fiar ita iha seguransa estabilidade, iha valór demokrásia di’ak hakarak mai investe bainhira iha ita rai ida-ne’e dudu ita-nia ekonomia la’o,” Deputadu ne’e hateten ba jornalista sira iha uma fukum PN, segunda ne’e.
Antes ne’e, Deputadu hosi bankada opozisaun FRETILIN preokupasaun PR nia kadeira la’ós iha Palásiu Prezidensiál maibé iha de’it aviaun laran, tanba kontinua halo viajen ba rai-li’ur.
Nune’e, Deputadu hosi bankada Governu ne’e dehan, preokupasaun ne’e bele tau iha diskusaun públiku maibé Prezidente Repúblika órgaun ketak ida unipesoál, nia hala’o mandatu tuir orden konstituisionál ninian.
“Buat ida-ne’ebé ita keta haluha iha 2017 oin mai, ita kuaze ita-nia relasaun diplomátika ho nasaun sira seluk la’ós laiha relasaun, maibé iha relasaun maibé ita hanoin katak iha komunikasaun ladún di’ak. Tanba, ita-nia polítika rai-laran no implementasaun demokrasia halo nasaun sira seluk barak bele hamiis uitoan sira-nia konfiansa ba ita nu’udar nasaun demokrátiku ida, atu haree duni sira iha kompromisu atu proteze no promove valór demokrásia iha sira-nia país ka lae, ligasaun ba ita-nia relasaun diplomátika,” nia dehan.
Aleinde Xefe Estadu hanesan mós Xefe diplomata ne’ebé bele enkoraja ita-nia diplomata iha nasaun sira seluk oinsá bele halo komunikasaun polítika di’ak liuliu ita-nia polítika esterna hodi hetan fali simpatia internasionál liuliu nasaun sira TL iha relasaun diplomátika.
Ne’eduni, preokupasaun Deputadu bankada Fretilin nian iha razaun tau iha diskusaun públika, maibé PR nia serbisu sira sai ba rai-li’ur importante ba TL no konstituisaun fó dalan no auzénsia hosi territóriu tenke hetan autorizasaun hosi PN, ne’ebé órgaun seluk laiha kompeténsia atu hapara viajen ka planu sira PR halo ho intensaun no objetivu hadi’a fali imajen Estadu nian, tanba ne’e la’ós PR hakarak sa’e de’it aviaun.
Iha loron 29 agostu 2023, Parlamentu Nasionál (PN) liuhosi reuniaun plenária aprova pedidu asentimentu hodi autoriza Prezidente Repúblika (PR), José Ramos Horta, hala’o vizita Estadu ba Cuba ho Estadu Unidu Amérika (EUA), ho rezultadu votasaun afavór 56, kontra 0 no abstensaun rua (2).
Tuir ajenda, PR nia vizita Estadu ba Habana-Cuba entre 12 no 16 setembru 2023, partisipa iha simeira G77+Xina no mós vizita Estadu ba entre 17 no 24 setembru 2023, hodi partisipa ba dala-78 sesaun Asembleia Jerál Organizasaun Nasaun Unida (ONU).
Parlamentu Nasionál tuir termu númeru 1 artigu 80 no alínea (h) númeru 3 artigu 95 konstituisaun fó asentimentu deslokasaun Prezidente Repúblika.
Deputadu Fretilin, Joaquim dos Santos, kestiona PR nia viajen kontinua sai hela de’it ba rai-li’ur, nune’e presiza hatene efeitu rezultadu polítiku no ekonómiku hosi viajen sira-ne’e, despeza Estadu liga ba serbisu diplomásia Ministeriu Negósiu Estranjeiru no Kooperasaun (MNEK) mak saida .
Jornalista : Nelson de Sousa
Editór : Cancio Ximenes
