Padre Sebastião: Timor prega nia ukun rásik aan ho sakrifísiu
COVALIMA, 05 setembru 2023 (TATOLI)—Pároku Igreja Ave Maria Suai, Sebastião Eugénio Coreia, hateten Timor-Leste prega nia ukun rasik ho sakrifísiu hosi povu Timor-Leste tomak.
Notísia Relevante: Biki’ak: “Masakre 06 setembru lori ha’u moris iha infernu laran”
” Ha’u lori ita halo reflesaun, tanba iha ita-nia ukun rasik aan. Ita hotu hanesan lilin lakan ne’ebé fó hanoin mai ita, hanesan maluk barak naben hodi fó naroman. Ita-nia rai doben harii ho ema nia sakrifísiu,” Pároku Igreja Ave Maria Suai, Sebastião Eugénio, hateten iha ninia omilia bainhira prezide kalan reflesaun hodi hanoin hikas Masakre Stembru Negro 1999 ba dala-24 (06 setembru 1999-06 setembru 2023) iha kampu eskola sekundáriu kátolika Ave Maria Suai, tersa ne’e.
Iha kalan reflesaun ne’e, nia dehan, Timor-Leste nia ukun rasik aan sura la nahas ranba ne’e bainhira hanoin sira-nia sakrifisiu oinsa atu luta hodi halo dezenvolvebimentu ba povu no rai ida-ne’e.
“Ita hanoin ona dezenvolvimentu ba rai ida-ne’e. Bainhira ita la valoriza nia mate, entaun sira-nia mate la moris ba ita . Se sira-nia mate mak ita-nia moris atu halo saida. Entaun, ba autoridade, joven no estudante sira saida mak atu halo ba rai ida-ne’e no oinsá atu fó moris ba povu,” nia hateten.
Ho eroi sira-nia sakrifísiu fó aan ba mate, nia hateten, hodi husik hela mensajen katak bainhira mate bele haree labarik-sira.
Programa kalan reflesaun hanesan kalan han hamutuk atu fahe malu, hanesan balun mate no balun sei moris atu kontinua luta tanba ho sira-nia mate ohin loron nasaun bele moris.
Programa kalan reflesaun ne’e aprezenta teatru kona-ba masakre Setembro Negro 1999, poezia, solo vokál hosi estudante ensinu Sekundáriu Jerál Públiku Suai, eskola Sekundáriu Katólika Ave Maria Suai (ESCAM) no loke filmajen sasin moris konta istória kona-ba masakre Setembru Negro 1999.
Tuir planu iha loron 6 Fulan setembru 1999-6 fulan-setembru 2023 sei husu misa hafoin misa sei tau aí-funan iha monumentu masakre setembru negro.
Jornalista : Celestina Teles
Editór : Cancio Ximenes
