PN hili Isabel Maria Fernandes de Jesus substitui Expedito ba membru CI
DILI, 05 setembru 2023 (TATOLI)—Parlamentu Nasionál (PN), tersa ne’e, liuhosi reuniaun plenária hili Isabel Maria Fernandes de Jesus hodi substitui ka troka Expedito Dias Ximenes ba iha membru Conselho de Imprensa (CI).
Notísia Relevante: Expedito husu PN aselera hili membru CI foun troka nia
Bankada CNRT mak aprezenta kandidatu refere ne’ebé liuhosi eleisaun sekretu ho votu a-favór 39, kontra 0 no abstensaun neen (6).
“Nune’e, ita hili no nomeia ona membru ba Conselho de Imprensa (CI) kompleta ona,” Prezidente Parlamentu Nasionál Interina no Atuál Primeira Vise Prezidente PN, Maria Terezinha Viegas, fó sai iha sala plenária PN.
Nia hateten, kandidatu ba membru CI iha lejislatura liu ba PN eleze membru ida mak Expedito Dias Ximenes, maibé nia agora asume hela kargu nu’udar Sekretáriu Estadu Komunikasaun Sosiál (SEKOMS), ho nune’e iha fulan-agostu liu ba loke fali ba submisaun kandidatura membru CI nian no meza simu de’it karta ida nomeasaun ba iha membru CI mak bankada CNRT submete kandidatu feto ida.
Karta Bankada CNRT subtituisaun no nomeasaun dirije ba Prezidente PN, komforme lei komunikasaun sosiál PN hili sidadaun na’in rua ne’ebé rekuiñese idonidade no iha méritu profisionál ho preferénsia ne’ebé hatutan ba komunikasaun sosiál nian no iha janeiru 2021 PN halo ona eleisaun no nomeasaun membru CI iha fulan-janeiru 2021 liu ba, kandidadu bankada CNRT eleisaun mak Expedito Dias Ximenes, maibé agora ba ona membru Governu nune’e hodi substitui fali kandidatu Isabel Maria Fernandes de Jesus.
Isabel Maria Fernandes de Jesus, moris iha suku Uailili, postu administrativu Baucau Vila, munisípiu Baucau, iha loron 11 fulan-novembru tinan 1987. Nia akaba estudu iha Sekolah Tinggi Ilmu Komunikasi (STIKOM) Bandung-Indonézia.
Hafoin ramata nia estudu, nia homan ninia matenek sira-ne’ebé hetan iha eskola hodi responsabiliza liuhosi hala’o kna’ar nu’udar jornalista no aprezentadora iha Rádiu Televizaun Timor-Leste (RTTL) hahú hosi 2014 to’o 2016.
Iha tinan 2014 to’o 2016, nu’udar dosente parte tempu komunikasaun sosiál iha Universidade Orientál (UNITAL).
Iha outubru 2016 to’o outubru 2017, hanesan Official Media Ministériu Planeamentu, Investimentu no Estratéjiku (MPIE), ne’ebé Kay Rala Xanana Gusmão lidera.
Iha novembru 2017 to’o juñu 2019, hanesan Koordenadora Produsaun no Programasaun iha Grupu Mídia Nasionál TV (GMN TV)-“Lori Timor Ba Mundu” no iha jullu 2019 to’o juñu 2022 nia assume kargu nu’udar Diretora Produsaun no Programasaun iha Grupu Midia Nasionál TV (GMN TV).
Iha fulan-jullu 2022 to’o fulan-fevereiru 2023, nia assume kargu nu’udar Diretora Informasaun Grupu Mídia Nasionál TV (GMN TV) no iha fulan-marsu 2023 to’o oras ne’e daudaun hanesan Koordenadora Komersiál iha Grupu Mídia Nasionál TV (GMN TV) no hosi 2014 to’o ohin loron, nia nafatin sai membru ativu iha Asosiasaun Jornalista Timor-Leste (AJTL).
Jornalista : Nelson de Sousa
Editór : Cancio Ximenes
