ATABAE, 05 setembru 2023 (TATOLI)- Uma-kain 167 iha aldeia Aidabaleten, suku Hataz, postu administrativu Atabae, munisípiu Bobonaro, asesu ona bee-moos, tanba segunda ne’e kompañia fornesidór Mira-Mar Unipesoál Lda instala ona mákina bomba elétrika ba sistema perfuraasaun bee-moos ne’ebé implementa liuhosi Programa Nasionál Dezenvolvimentu Suku (PNDS).
“Ami-nia pripridade ba Bee-Moos entaun programa PNDS ami tau orsamentu halo perfuraasaun, ohin loron uma-kain 167 no abitante 500-resin mak asesu ba Bee-Moos,” Xefe suku Hataz, Diamintino dos Santos, informa ba Jornalista sira iha terrenu, hafoin obeserva prosesu instalasaun bomba elétrika.
Líder komunitária ne’e konfirma, tuir loloos projetu refere finaliza ona tanba implementa dezde tinan 2021, maibé tanba matadalatan programa PNDS ba Bee-Moos nia difikulta implementadór no fornesidór sira aselera servisu.
Nia justifika matadalan hateten katak iha programa ne’e fahe ba item tolu ba dahuluk halo perfuraasaun bee, daruak distribui materiál no datoluk mak mákina bomba elétrika.
“Ida-ne’e mak prezudika ami, halo tarde, loloos perfuraasaun ne’e item ida de’it, ida-ne’e kontratu oituan tanba fahe ba item tolu, entaun perfuraasaun lais, maibé implementasaun atu tau Bomba ne’e tarde, tanba bomba elétrika ne’e mós sei hameno to’o 2023, ohin loron mak foin monta,” nia katak.
Benifisiáriu Clementino da Conceiçãoao, sente kontenti no agradese ba governu tanba fiar katak sistema bomba elétrika ne’e sei kanaliza bee ba tanki distribuisaun, rezervatóriu inklui torneira sira ho sufisiente no kapasidade boot.
Joven ne’e konsidera programa ne’e bele hakamaan ona komunidade sira-nia preokupasaun, maske nia implementasaun la’o tarde.
“Ida-ne’e pela primeira-vez estadu mai halo perfuraasaun bee, ami orgulu tebes tanba uluk komunidade sira diskute malu ba bee iha posu Bilakobu no ami jalerik ba bee, senti triste tanba lalin bee hosi mota mai iha-ne’e hodi fó hariIs oan sira ba eskola atu hetan edukasaun,” nia dehan.
Enkuantu distánsia hosi Bee-Matan baa tanki rezervatóriu metru 230 hafoin fornse ba komunidade hotu iha aldeia ne’e.
Entretantu totál orsamentu ne’ebé gasta ba obra refere hamutuk rihun $45. Hosi montante ne’e aloka item sira hanesan perfuraasaun bee, materiál instalasaun ho tanki rezervatóriu no bomba elétrika.
Notísia relevante: Komunidade Hataz entuziasmu simu tratamentu saúde gratuita hosi F-FDTL
Jornalista: Sérgio da Cruz
Editór: Evaristo Soares Martins
