Xanana no Jokowi diskute kompromisu Indonézia apoia rekursu no ekonomia
DILI, 05 setembru 2023 (TATOLI)-–Prezidente Repúblika Indonézia, Joko Widodo ‘Jokowi’ no Primeiru-Ministru, Kay Rala Xanana Gusmão, halo enkontru bilaterál, iha segunda (04/09) hodi diskute kona-ba kompromisu Indonézia atu apoia rekursu umanu no ekonomia bainhira Timor-Leste sai membru plenu Asosiasaun Nasaun Sudeste Aziátiku (ASEAN, sigla inglés).
“Indonézia no Timor-Leste hanesan nasaun maun alin, nune’e ita-nia kooperasaun tenke metin liután. Ha’u hakarak informa asuntu tolu, ba dahuluk kona-ba Timor-Leste sai membru iha ASEAN, Indonézia sempre ajuda no adezaun Timor-Leste atu sai membru no kapasitasaun rekursu umanu ba membru Governu sira ne’e importante,” Jokowi hateten liuhosi nota ne’ebé Agência Tatoli asesu, tersa ne’e.
Prezidente Repúblika Jokowi agradese bele hasoru malu ho Xanana no iha ámbitu ne’e hato’o felisitasaun ba Governu no povu Timor-Leste.
Aleinde ne’e, Jokowi afirma país rua sei kontinua serbisu hamutuk hodi ajuda rekursu umanu no setór ekonomia inklui dezenvolvimentu infraestrutura Timor-Leste.
Notísia relevante : Governu planeia realiza semináriu kona-ba importánsia sai membru plenu ASEAN
Biban hanesan, Primeiru-Ministru Xanana agradese Jokowi ne’ebé konvida ona Timor-Leste partisipa iha fórum Association of Southeast Asian Nation Business & Investment Summit 2023 ba dala-43 iha Jakarta, Indonézia.
“Ha’u hato’o obrigadu barak ba Prezidente ne’ebé fó konvite ne’e mai ha’u. Ha’u orgullu tebes, hanesan Prezidente dehan loos, ita maun alin no atendimentu durante ne’e di’ak tebes. Ita hanoin katak ida-ne’e tenke metin liután,” Xanana akresenta.
Xefe Governu kongratula Estadu Indonézia ne’ebé sai uma-na’in no organiza fórum ne’ebé konvida xefe Estadu no xefe Governu nasaun 26 inklui Timor-Leste atu hola parte nu’udar observadór atubele apreende esperiénsia no matenek nasaun membru sira.
Parade militár simu Xanana ho delegasaun bainhira to’o iha Palásiu Prezidensiál Indonézia no kontinua kedas hasai fotografia no asina livru onra molok realiza enkontru bilaterál.
Vizita Primeiru-Ministru Xanana akompaña direta hosi Vise Primeiru-Ministru no Ministru Koordenadór ba Asuntu Ekonómiku, Ministru Turizmu no Ambiente Francisco Kalbuadi Lay, Ministru Negósiu Estranjeiru no Kooperasaun Bendito dos Santos Freitas, Ministru Interiór, Fransisco Guterres, no Vise-Ministra Asuntu ASEAN Milena Rangel, enkuantu Prezidente Repúblika Jokowi akompaña hosi Ministra Negósiu Estranjeiru Retno Lestari Priansari Marsudi, Sekretáriu Gabinete Pramono Anung, Ministru Koordenadór Asuntu Polítiku, Lei no Seguransa Mahfud MD, no Ministru Agrikultura Syahrul Yasin Limpo.
Jornalista : Antónia Gusmão
Editora : Julia Chatarina
