MALIANA, 06 setembru 2023 (TATOLI) – Abitante sira iha aldeia Faturui, suku Leo-Lima, postu administrativu Balibó, munisípiu Bobonaro, durante tinan 20 ona sei kontinua halerik ba infraestrutura bázika hanesan bee-moos, elétrika no estrada.
Konsellu Juventude Aldeia Faturui, Deolindo Bere Soares, hateten suku Leo-Lima iha aldeia haat hosi totál ne’e aldeia tolu seluk asesu ona elétrika, falta aldeia Faturui mesak de’it mak to’o agora sei kontinua hela iha nakukun laran.
Kona-bá bee-moos, abitante ne’e konfirma iha tempu udan asesu ho di’ak, maibé iha tempu bailoro naruk mak susar tebes atu hetan tanba debitu bee menus no atu kuru tenke la’o ho distánsia dook.
Alende ne’e kondisaun estrada ligasaun hosi parte Manduki ba Maliana mós difikulta tebes komunidade sira, liuliu bainhira inan isin-rua atu partu tenke leva de’it ba sentru saúde Balibó Vila tanba kondisaun estrada ladi’ak.
“Ami husu ba Governu agora ne’e hadi’ak ami-nia estrada, bee-moos no dada netik ami aldeia Faturui nia ahi, ami presiza buat tolu ne’e de’it, tanba ami ne’e hanesan seidauk senti dehan ukun-aan,” nia informa ba Jornalista sira iha bairru Surilaku, segunda ne’e.
Konsellu juventude ne’e husu ba parte saúde atu halo atendimentu saúde direita ba komunidade sira iha aldeia ne’e liuhosi programa klínika movél, tanba bainhira moras sira tenke la’o-ain ba sentru saúde Balibó mak foin hetan tulun tratamentu saúde.
Xefe suku Leolima, Marcelino Magno, konfirma antes ne’e liuhosi Programa Nasionál Dezenvolvimentu Suku (PNDS) atu dada bee-moos, maibé la konsege implementa tanba orsamentu la sufisiente.
Nia dehan, bee-moos sai problema sériu ba komunidade aldeia Faturui tanba tempu bailoro hahú fulan agustu ne’e kedas bee posu sira maran hotu.
“Tempu hanesan bee ne’e araska tebes, sira tenke sosa sentavu $0,25, lae aluga ema-nia motorizada mak ba kuru hosi sira-nia fatin ba mota kauze kilómetru 3, ne’e ferik-katuas sira araska tebes,” Xefe suku ne’e informa.
Liga ba elétrika, líder komunitária ne’e justifika antes ne’e governu aprova proposta no hein atu halo ona verifikasaun mak veteranu balu halo impedimentu nune’e kansela tiha projetu refere.
“Ha’u husu ba oin di’akliu Governu halo programa ne’e liuhosi sistema konkursu públiku di’ak liu, kuandu ita fó ba malu de’it o’o ikus sai fali hanesan ne’e,” Xefes uku ne’e fó hanoin ba Governu.
Ligada ho problema hirak-ne’e, autoridade lokál ne’e husu ba IX Governu liuhosi ministériu relevante sira atu halo intervensaun lalais nune’e komunidade aldeia ne’e mós bele sente dezenvolvimentu hanesan ho komunidade sira iha aldeia no suku seluk.
Tuir dadus monografia suku Leolima totál abitante iha aldeia ne’e hamutuk uma-kain 118.
Notísia relevante: Ministériu Saúde presiza estabelese postu saúde iha Bour Leolima
Jornalista : Sérgio da Cruz
Editór : Evaristo Soares Martins
