Top

Empreza nasionál loke dalan hosi Buanurak liga Caraubalu Viqueque

Empreza Belas Lari Unipesoal, Lda hahú mobiliza ekipamentu hodi loke dalan, iha suku Caraubalu, tersa (05/09/2023). Imajen Tatoli/Vitorino Lopes da Costa

VIQUEQUE, 06 setembru 2023 (TATOLI)—Sekretáriu munisípiu Viqueque, Teotónio Sarmento da Silva, informa, empreza Belas Lari Unipesoal, Lda ne’ebé sai manán-na’in ba projetu, hahú loke dalan kilómetru haat hosi Buanuarak suku Uabubu, postu Ossu liga ba suku Caraubalu, postu Viqueque Vila, munisípiu Viqueque.

“Ohin empreza responsável destaka ona ekipamentu pezadu hodi loke dalan hosi aldeia Buanurak to’o suku Caraubalu ho naruk kilómetru haat. Daudaun ne’e, destaka ona ekipamentu pezadu iha aldeia Has-abut, nune’e aban (kinta) sira hahú kehe dalan foun,” Teotónio Sarmento da Silva, hateten iha ninia knaar fatin, administrasaun munisipál, Viqueque Vila, kuarta ne’e.

Notísia relevante : Administrasaun Viqueque loke konkursu dalan foun liga ba futuru ospitál munisipál

Lia-na’in hosi parte Caraubalu halo ona serimónia kulturál nune’e bainhira empreza sira halo serbisu karik labele mosu buat ruma.

“Serimónia kulturál hodi simu matak malirin hosi lia-na’in sira. Tanba ne’e, ohin halo ona kulturál, ne’ebé aban sira hahú serbisu, tuir loloos dalan ne’e kehe iha semana kotuk maibé ekipamentu dook laiha fatin, entaun ohin maka ekipamentu pezadu foin to’o fatin,” nia akresenta.

Dalan foun ne’ebé loke atu sai dalan alternativa tanba daudaun dalan Lugatohi kontinua fó ameasa ba transporte públiku sira.

“Ita laiha dalan alternativa hodi hakat liu Lugatohi, tanba ne’e dalan foun ne’ebé ita loke agora bele asesu ona karik, bele sai alternativa bainhira dalan Lugatohi seidauk rezolve,” Sekretáriu munisípiu Viqueque adianta.

Dalan foun ne’e sei liga ba futuru ospitál munisipál, ne’ebé antes ne’e abitante sira oferese ona rai ektare sia hodi implementa obra, inklui futuru edifísiu munisípiu Viqueque iha rai ektare tolu iha mota sorin.

“Nune’e iha futuru bainhira ita halo konstrusaun ospitál bele prienxe ona rekezitu hosi banku mundiál nian,” nia tenik.

Molok loke dalan foun, Autoridade munisípiu Viqueque halo ona koordenasaun entre rai-na’in no Autoridade suku Carabalu atu abitante sira bele asesu ba dalan foun.

Dalan ho naruk kilómetru haat hahú hosi aldeia Buanutak to’o Ensinu Sekundáriu Jerál 04 setembru iha suku Caraubalu, ho kustu estimativu $267.653,39, ho durasaun serbisu fulan-tolu.

Jornalista     : Vitorino Lopes da Costa
Editora          : Julia Chatarina

Publisidade

Leave a Reply

Latest Post

error: Content is protected !!