VIQUEQUE, 22 juñu 2023 (TATOLI)—Administrasaun munisípiu Viqueque, daudaun ne’e loke hela konkursu públiku loke dalan foun liga ba fatin konstrusaun ospitál munisipál.
“Ita loke hela konkursu dalan foun liga ba konstrusaun ospitál munisipál Viqueque, ne’ebé liuhosi orsamentu normál. Foin lalais halo pedidu ba fundu kontijénsia hodi loke estrada alternativa ida, nune’e sei loke hosi área Buanurak liga ba fatin konstrusaun ospitál no futuru konstrusaun Administrasaun munisípiu Viqueque ne’ebé hetan ona aprovasaun ona hosi Ajénsia Dezenvolvimentu Nasionál, Institutu Públiku (ADN, I.P). Ha’u halo despaixu ona ba aprovizionamentu hodi halo konkursu,” Administradór munisípiu Viqueque, Januário Soares ‘Bolly’, informa ba Agência Tatoli iha ninia knaar fatin, kinta ne’e.
Aprovizionamentu ba projetu ne’e ho modalidade tolu hanensan konkursu públiku, kuotasaun no ajudikasaun direta.
“Ami tene aselera prosesu tanba loke dalan foun ne’e demora ona, tanba fulan-jullu Banku mundiál sei mai haree preparasaun ba konstrusaun ospitál munisipál nian. Banku Mundiál fó kritériu ba konstrusaun ospitál hanesan tenke iha bee, eletrisidade no dalan. Dalan ne’e maka agora ami loke konkursu no tempu besik ami sei implementa,” nia akresenta.
Notísia relevante : MS ho autoridade diskute planu konstrusaun ospitál munisipál Viqueque
Nune’e, Autoridade munisipál ne’e husu ba empreza sira iha Viqueque ne’ebé maka iha interese bele partisipa iha konkursu públiku loke dalan foun durante semana-rua, hafoin ekipa relata ba Unidade Traballu Espesífiku (UTE) hodi halo avaliasaun ba dokumentu sira.
“Tipu loke estrada foun ne’e sei aterru uluk hodi uza, depois ba oin maka ita haree fali,” nia tenik.
Distánsia loke dalan hahú hosi aldeia Buanuruak, suku Uabubu bá suku Karaubalu ho totál 0+000-4-320.
Jornalista : Vitorino Lopes da Costa
Editora : Julia Chatarina
