Pe. Sebastião: “Iha Ukun Rasik Aan unidade naksobu tanba interrese grupu”
COVALIMA, 06 setembru 2023 (TATOLI)—Pároku Igreja Ave Maria Suai, Pe. Sebastião Eugénio da Cruz Coreia, hateten iha tempu ukun rasik aan nia laran ne’e unidade no morál naksobu tanba ema ida-idak interrese ba nia grupu.
Notísia Relevante: Dezeñu santuáriu Padre Hilario-Francisco-Dewanto finaliza ona
“Iha tempu ita ukun rasik aan ne’e, halo ema sei kotuk ba malu la hanesan ho uluk ita-nia luta ba ukun rasik aan,” Pe. Sebastião Eugénio da Cruz Coreia hateten ba jornalista sira iha resintu kampu ESCAM Suai, kuarta ne’e.
Iha prosesu luta ba ukun rasik aan kria grupu oioin maibé sira iha hanoin ida de’it hodi luta ba rai no povu hodi buka ukun rasik aan, maibé agora ema hotu sei kotuk balu malu bainhira la’ós nia grupu no nia família.
Pároku ne’e husu ba estudante no joven sira-ne’ebé eskola ka la’e balun iha ona servisu no balun seidauk ne’e hadomi malu ba, tanba eroi sira rai hela asaun labele haree ba grupu sira-ne’ebé envolve hodi fila kotuk, maske envolve iha grupu ketak maibé nia hola parte iha povu ida no nasaun nia ema.
Realidade agora duadaun konflitu barak mosu hodi asalta malu entre grupu sira hanesan Grupu Arte Marsiál (GAM) no Grupu Arte Rituál (GAR) ida hodi kontra grupu arte marsiál seluk no arte rituál ida kontra arte rituál seluk, ida ne’e mak eroi sira-nia mate
“Eroi sira-nia mate husik hela ami la’ós haruka ita atu asalta malu maibé hasees hosi ita violénsia ba malu hosi hahalok kriminozu. Eroi sira mate la’ós tanba sira kriminozu la’e, maibé sira hamomi ita no povu ida-ne’e ba sira-nia mate,” nia dehan.
Maske Timor seidauk iha kampu traballu joven balun finaliza ona eskola seidauk iha servisu, balun sei eskola hodi luta hela maibé keta haluha dalan sei naruk tenke hadomi nia aan luta servisu nune’e bele atinje mehi
Prezidente Komisaun Organizadora, Domingos Oliveira “Foti Riba”, husu joven sira tenke iha unidade tanba ema rihun resin unidade hodi funu atu hetan nia independénsia maibé agora ho grupu la haree ba nia inan-aman nia sakrifísiu
“Ha’u joven tenke banati tuir joven-sira uluk ne’ebé unidade hodi luta, nune’e bele hetan nia independénsia,” nia hateten.
Notísia Relevante: Masakre Suai 1999: Padre Hilario-Francisco-Dewanto hakoi iha tasi ibun Metamau
Jornalista : Celestina Teles
Editór : Cancio Ximenes
