iklan

INTERNASIONÁL, HEADLINE

Prezidente Jokowi husu membru ASEAN solusiona junta militár iha Myanmar

Prezidente Jokowi husu membru ASEAN solusiona junta militár iha Myanmar

Prezidente Repúblika Indonézia Joko Widodo ‘Jokowi’, hato’o diskursu iha Konferénsia nível a’as ASEAN 2023, iha Plenary Hall, Sentru Konvensaun Jakarta (JCC), tersa (05/09/2023). Imajen/Mídia GPM

DILI, 06 setembru 2023 (TATOLI)Prezidente Repúblika Indonézia, Joko Widodo ‘Jokowi’ husu ba líder membru Asosiasaun Nasaun Sudeste Aziátiku (ASEAN, sigla inglés) atu tuur hamutuk halo diálogu hodi fó solusaun ba kazu junta militár iha Myanmar.

Xefe Estadu Indonézia husu atu akordu five point consensus (P5) ne’ebé líder ASEAN sira asina iha tinan 2021 tenke implementa ona hodi hakotu problema étniku no junta militár ne’ebé to’o agora kontinua akontese.

“Ba interese família ASEAN, ita tenke brani halo evaluasaun ba an hosi deskute problema no buka solusaun hamutuk, ita presiza buka solusaun pasífiku no extraordináriu atu implementa ona five point consensus,” Prezidente Jokowi hateten iha ámbitu konferénsia nível a’as ASEAN ba dala-43, iha edifísiu Plenary Hall, Sentru Konvensaun Jakarta (JCC), tersa (05/09).

Notísia relevante : Espesialista apoia Timor-Leste ezije ASEAN restaura demokrásia iha Myanmar

Akordu P5 maka hanesan:

  1. Hapara imediata violénsia iha Myanmar,
  2. Kria diálogu konstrutivu entre parte relevante sira hodi buka solusaun pasífika iha Myanmar,
  3. Enviadu hosi ASEAN tenke fasilita prosesu mediasaun ba diálogu ho asisténsia hosi Sekretáriu Jerál ASEAN,
  4. ASEAN tenke fornese asisténsia umanitária liuhosi Sentru Asisténsia Humanitária ba Jestaun Dezastre (AHA Center, sigla inglés)
  5. Enviadu Espesiál no delegasaun ASEAN tenke vizita Myanmar hodi hasoru malu ho parte importante sira hotu ne’ebé problema hodi solusiona problema hotu iha Myanmar.

Tuir Jokowi, membru ASEAN nu’udar família boot ida, tanba ne’e labele husik malu no tenke ajuda malu, bainhira nasaun membru ida ho nia povu hasoru konflitu hanesan kazu Myanmar nian.

Enkontru nível a’as ASEAN 2023 la partisipa hosi líder Myanmar tanba konflitu junta militár.

Antes ne’e, Primeiru-Ministru, Kay Rala Xanana Gusmão husu ba líder ASEAN atu fó solusaun ba kazu Myanmar, ne’ebé idea ne’e hetan resposta pozitivu hosi Espesialista ba Dezenvolvimentu Rekusu Umanu ASEAN, Bob Aubrey, apoia pozisaun polítika Timor-Leste hasoru insjustisa iha Myanmar no ezije restaura hikas orden demokrátiku.

Bob Aubrey konsidera ezijénsia Estadu Timor-Leste atu líder ASEAN rezolve konflitu no krize politika militár iha Myanmar reflete five point consensus ne’ebé membru ASEAN deside hafoin golpe militár akontese, maibé to’o agora Myanmar seidauk kumpre.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!