DILI, 06 setembru 2023 (TATOLI) – Projetu reabilitasaun jardin matak iha Timor Lodge oin, iha Comoro, estende tan to’o novembru, tanba komunidade sira ne’ebé hela iha jardin seidauk sai, nune’e difikulta empreza atu finaliza obra.
Diretór kompañia ASET, Augusto Soares, dehan família sia mak hela iha jardín laran no lima sai ona, maibé sei hela uma-kain haat.
“Sira hela iha jardín laran ne’e halo mós negósiu. Fó uma ba ema aluga depois kada fulan sira hetan lukru”, Augusto afirma ba Tatoli, iha Hudi-Laran, Dili.
Jardin ne’e Governu hakarak atu reabilita, entanto komunidade seidauk sai, nune’e hamosu difikuldade boot ba empreza tanba ida ne’e atraza prosesu reabilitasaun jardin refere.
Durasaun projetu ne’e la’o ona fulan neen liu, hahú iha fevereiru, enkuantu kontratu dahuluk ne’e ba fulan tolu de’it, maibé ho difikuldade sira ne’ebé hasoru mak estende ba faze daruak no agora ba datoluk.
“Kontratu halo ho na’in ba projetu fulan tolu, maibé kompañia ASET la konsege halo buat barak depois hetan estensaun ba fulan tolu tan, ne’e mós labele nafatin. Agora tama ona ba estensaun faze datoluk tanba sei kontinua ho prosesu hasai komunidade [iha jardin]”, realsa.
Nune’e empreza husu ona ba na’in ba projetu Diresaun Nasionál Urbanizmu Ministériu Obra Públika (MOP) hodi fó tan tempu atubele rezolve problema sira ne’e no sei aselera prosesu reabilitasaun ne’e.
Jardin ho naruk metru 240 ne’e konstrui ho osan $269.923. Fatin ne’e atu kuda ai-funan, duut, instala lampu, monta vazu sira, hadi’a valeta no seluk tan.
Notísia relevante: Kompañia ASET hapara traballadór 33 konstrui jardin iha Timor Lodge oin
Jornalista: Tomé Amado
Editora: Maria Auxiliadora
