Kompañia ASET hapara traballadór 33 konstrui jardin iha Timor Lodge oin
DILI, 24 juñu 2023 (TATOLI)–Konstrusaun no Reabilitasaun jardín matak iha Timor Lodge oin, iha Avenida Prezidente Nikolau Lobato nian ne’e paradu durante semana tolu nia laran, tanba kompañia ASET Unipesoál, Lda, hapara tiha traballadór na’in-33 ne’ebé servisu la hatudu kualidade.
Diretór Kompañia ASET Unipesoál, Lda, Agostu da Costa Soares, hateten kompañia ho Governu halo kontratu bá fulan tolu primeiru hahú hosi fevereiru to’o maiu, hodi fó konfiansa ba kompañia atu hadi’a jardín verde iha Timor Lodge oin, maibé projetu ne’e la’o tiha fulan rua resin, kompañia hasoru difikuldade ho traballadór sira tanba la hatudu kualidade servisu.
“Ami hakarak hatudu kualidade servisu tanba ami hetan konfiansa hosi Governu, tanba ne’e ami ezije ba traballadór sira tenke servisu ho kualidade no responsabilidade atu bele hetan rezultadu ida di’ak duni maibé traballadór sira la kumpre. Tanba ne’e mak ami hapara tiha sira na’in-33 hosi projetu ne’e,” Diretór ne’e hateten ba Aência Tatoli iha nia kna’ar fatin Hudi Laran, Bairru Pite, sábadu ne’e.
Maibé, nia dehan, projetu ne’e agora hahú la’o fali ona ho volume servisu ne’ebé sei ki’ik ho traballadór limitadu, tanba sei foku hela ba monta paving iha baleta leten, tanba ne’e kompañia seidauk presiza atu rekruta tan traballadór.
Antes ne’e, traballadór ne’ebé servisu iha projetu ne’e hamutuk 39 maibé kompañia hapara tiha sira na’in-33 no agora hela de’it na’in-neen (6) maka sei kontinua halao servisu servisu.
Traballadór na’in-33 ne’ebé kompañia hapara hosi projetu ne’e akontese iha fulan-maiu 2023 ho etapa rua, mak hosi etapa dahuluk hapara na’in-25 mak hafoin etapa daruak hapara tan na’in-hitu (7).
Projetu ne’e ninia durasaun tempu fulan neen de’it, kontratu fulan tolu primeiru hahú iha fevereiru to’o maiu maibé kompañia la konsege aselera ninia progresu servisu tuir durasaun tempu ne’ebé termina, tanba difikuldade ho traballadór inklui fallansu seluk ho komunidade ne’ebé sei hela iha jardín laran inklui riin eletrisidade iha jardín laran ne’e governu seidauk hasai.
Ho nune’e, Governu deside extende tan kontratu ho kompañia ASET ba fulan tolu tan hahú hosi juñu to’o setembru, atu sira mós bele aselera sira ninia prosesu buka solusaun ba família sira-ne’e, kompañia bele aselera ninia responsabilidade hodi konstrui jardín verde ne’e.
“Ami kontinua foku hela ba monta paving iha baleta leten tanba ami presiza hetan mós apoiu hosi Governu atu rezolve problema ho komunidade hela iha jardín ne’e inklui riin eletrisidade ne’ebé sei tau hela ha jardín laran. Tanba, ami presiza fatin ne’e mamuk ona atu fulan tolu daruak ne’e ami bele aselera ona prosesu servisu,” nia dehan
Jardín ho naruk metro 240 ne’ebé Governu fó fiar ba kompañia ASET atu konstrui sai jardín verde ne’e prevee ona osan ho montante $269,923.38 atu kuda ai-funan, kuda duut, instala lampu, monta pot sira, hadi’a baleta, monta paving no ikus sei chor.
Maibé, nia hateten, xefe família sia (9) mak sei hela iha jardín laran ne’e mak sei lori hela difikuldade ba kompañia atu aselera konstrusaun refere.
Nia hateten, konstrusaun no reabilitasaun jardín ne’e atinje ona 28% no agora hahú fali servisu ne’e kompañia garante iha fulan tolu nia laran ne’e, sira bele hatudu rezultadu di’ak no progresu servisu ne’ebé aas, atu bele finaliza hodi entrega ba Governu tuir duni tempu ne’ebé termina ona.
Jornalista : Tomé Amado
Editór : Cancio Ximenes
