iklan

NASIONÁL, EKONOMIA, HEADLINE

ABS no INETL, I.P renova akordu kooperasaun hametin sistema dadus estatístika

ABS no INETL, I.P renova akordu kooperasaun hametin sistema dadus estatístika

Prezidente INETL, I.P, Elias dos Santos no Diretór Jerál infraestrutura estatístika divizaun dadus, gabinete australianu ba estatístika no patrosinadór ezekutivu ba Timor-Leste, Michael Smedes, asina akordu kooperasaun ne’ebé akompaña hosi Vise Ministru Finansa, Helder Lopes no Enkarregada Negósiu Austrália iha Timor-Leste, Caitlyn Wilson, iha Auditóriu Ministériu Finansa, Aitarak-laran, kinta (07/09/2023). Imajen Tatoli/Cidalia Fátima

DILI, 07 setembru 2023 (TATOLI)Australian Bureau of Statistics (ABS) hosi Austrália no Institutu Nasionál Estatístika Timor-Leste, Institutu Públiku (INETL, I.P), kinta ne’e, renova akordu kooperasaun atu hametin sistema estatístika iha Timor-Leste, ba tinan-tolu oin mai.

Prezidente INETL, I.P, Elias dos Santos, informa, akordu ne’e hala’o ona desde tinan 2010 iha área importante haat hanesan estatístika ekonomia, Index Presu Konsumidór, konta nasionál, peskiza emprezariál, no kapasitasaun ba líder oinsá lidera Institutu Nasionál Estatístika.

“Akordu ne’e hanesan kontinuasaun, loloos selebrasaun asinatura akordu ne’e hala’o iha tinan 2021 maibé la konsege realiza tanba Timor-Leste hasoru pandemia COVID-19, tanba ne’e adia. Kooperasaun ne’e realiza durante tinan-tolu, hahú tinan 2023 to’o 2026. Akordu ne’ebé selebra iha área estatíska turizmu, produsaun ba index no kontinuasaun ba formasaun líder,” Prezidente INETL, I.P hateten iha ámbitu selebrasaun akordu kooperasaun ne’e.

Akorde ne’e asina hosi Prezidente INETL, I.P, Elias dos Santos no Diretór Jerál infraestrutura estatístika divizaun dadus, gabinete australianu ba estatístika no patrosinadór ezekutivu ba Timor-Leste, Michael Smedes, ne’ebé akompaña hosi Vise Ministru Finansa, Helder Lopes no Enkarregada Negósiu Austrália iha Timor-Leste, Caitlyn Wilson, iha Auditóriu Ministériu Finansa, Aitarak-laran, kinta ne’e.

Biban ne’e, Vise Ministru Finansa, Helder Lopes, konsidera eventu ne’e importante tebes ba INETL, I.P atu promove serbisu hodi kontinua benefisia Governu no povu Timor-Leste.

“Agradese ba Austrália ne’ebé kontinua fó apoia mai ita, ho kooperasaun ida-ne’e ita sei kontinua fó benefísiu ba povu Timor, liu-liu prodús dadus estatístika, formasaun, infraestrutura no introdusaun estrutura. Área ida-ne’e importante tebes hodi Governu nafatin fó asisténsia ba INETL hodi fó dadus estatístika ne’ebé kualidade”, Vise Ministru Finansa hateten.

Notísia relevante : Vise-Ministru Finansa husu INETL prodús dadus ho kualidade di’ak

Nia dehan, IX Governu iha tinan-lima mai sei kontinua promove evidénsia ba prosesu foti dezisaun nune’e dadus estatístika ne’ebé akurásia sei apoia tebes. Daudaun ne’e INETL, I.P sei esforsu hela atu hamriik mesak nune’e sei laiha intervensaun polítika hodi bele halo serbisu ho di’ak.

“Maibé hodi hetan apoia INETL, I.P tenke kontinua dezenvolve-an no ita espera ba oin institutu bele apoia Governu tanba iha tinan oin Governu planeia atu halo estudu ba kiak tanba hakarak atu hatun ba 10% iha tinan-lima tuir mai. Hosi ne’e ita tenke iha dadus kompletu,” nia tenik.

Ministériu Finansa liuhosi planu fiskál atu realiza estudu negósiu hodi haree taxa iha Timor-Leste nune’e bele hatene kle’an taxa ba importasaun no exportasaun.

“Ida-ne’e tama ba planu tinan oin. Bainhira ita atu halo dezisaun di’ak tenke iha dadus kompletu nune’e ita bele proteje negosiadór sira. Buat seluk ha’u hakarak hato’o mak tinan-ida ona prodús dadus Gross domestic product (GDP). Ha’u espera akordu ida-ne’e bele kobre hotu nesesidade sira,” governante adianta.

Nune’e mós, Enkarregada Negósiu Austrália, Caitlyn Wilson, konsidera akordu ne’e importante ba instituisaun rua.

“Ba Governu Austrália, ita rekoñese tebes kooperasaun serbisu naruk ho INETL, I.P, ho amizade ne’ebé ita iha mak ohin loron kooperasun ne’e nafatin kontinua, ida-ne’e ezemplu di’ak tebes. Dadus estatístika importante tebes ba prosesu foti dezisaun, tanba ne’e importante tebes atu iha dadus estatístika ne’ebé akurásia nune’e fó valór ba ita-nia dezisaun,” Caitlyn Wilson tenik.

Nia salienta, akordu kooperasaun ne’e bele atinje meta no planu.

“Espera bele implementa ho di’ak. Ha’u kontente hodi hein rezultadu hosi koperasaun ida-ne’e,” Caitlyn Wilson akresenta.

Diretór Jerál infraestrutura estatístika divizaun dadus, gabinete australianu ba estatístika no patrosinadór ezekutivu ba Timor-Leste, Michael Smedes, akresenta, kooperasaun ne’e sei apoia hasa’e kualidade sistema estatístika iha Timor-Leste.

“Ami kontente tebes hala’o koperasaun ida-ne’e hodi hasoru hamutuk dezafiu sira liuhosi apreende no kolaborasaun ne’e bele hasa’e kapasidade institusionál,” nia subliña.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!