OÉ-CUSSE, 07 setembru 2023 (TATOLI – Estudante sira hosi suku Bobometo, sub-rejiaun Oésilo hamutuk na’in-150, kinta ne’e la’o-ain durante oras lima hosi eis merkadu Tono, suku Cunha to’o Oésilo sentru, suku Bobometo hodi ba kari ai-funan no sunu-lilin iha loron masakre Tumin ne’ebé sei selebra iha loron sábadu, 09 setembru ne’e.
Notísia relevante: Komunidade Tumin-Quibiselo hasa’e bandeira iha uma oin hanoin hikas 09 setembru 1999
Estudante hirak-ne’e komposta hosi feto no mane, hahú la’o ain hosi eis merkadu Tono hahu hosi tuku 09:00 dadeersan no deskansa iha Oésilo sentru iha tuku 13:00, kontinua ba Tumin, suku Bobometo iha loron sesta, 08 setembru hodi komemora iha loron sábadu, 09 setembru.
“Ami nia jornada viajen ida-ne’e, hahú ohin dadeer tuku 9, hahú hosi eis merkadu Tono, suku Cunha liuhosi suku Naimeko, sub-rejiaun Pante Maaksar mai to’o Oésilo sentru tuku 13:00 maka ami deskansa, depois sei kontinua fali iha aban dadeer ba to’o Tumin, bainrua ami bele kari ai-funan no sunu lilin iha semitériu,” Responsável grupu estudanate João Baptista Colo, ba Tatoli iha Oésilo.
Nia haktuir, durante jornada viajen liuhosi suku no aldeia sira-ne’ebe mensiona iha leten, sira identifika problema sosiál barak maka komunidade sira enfrenta.
Hanesan infraestrutura bázika, kondisaun dalan ladún di’ak no problema bee-moos tanba komunidade sira leba masa la’o ba buka bee.
“Ida-ne’e maka ohin ami haree, maibé ba ami-nia viajen durante oras lima situsaun la’o di’ak no kontroladu, tanba ami la’o tuir sorin, hodi fó espasu ba transporte no ema bele liu, la’os taka tomak estrada,” nia katak.
“Ami maioria estudante mai hosi joven Bobometo atu ba selebra masakre Tumin iha sábadu bainrua, tan ne’e ohin ami la’o ain hosi Tono kaer bandeira RDTL hodi anima ita-nia inan-aman sira katak, loron 09 setembru ne’e loron istória ida ba Oé-Cusse tanba iha momentu ne’ebá joven no katuas na’in-84 mate tanba milisia maka oho,” nia dehan.
Notísia relevante: Sobrevivente Masakre Tumin husu Governu dignifika povu ho dezenvolvimentu
Jornalista : Abílio Elo Nini
Editor : Evaristo Soares Martins
