VIQUEQUE, 07 setembru 2023 (TATOLI)—Ministériu Solidaridade Sosiál no Inkluzaun (MSSI) rejista labarik idade 0-5 no inan isin-rua hamutuk na’in-87 iha suku Afaloikai, postu Uatucarbau, munisípiu Viqueque sai benefisiáriu ba programa Bolsa da Mãe Jerasaun Foun.
“Ami hahú rejista labarik no inan isin-rua sira ba programa Bolsa da Mãe Jerasaun Foun, faze dahuluk iha fulan-marsu, nune’e to’o agora rejista ona benefisiáriu na’in-87,” Ofisiál Rejistu Bolsa da Mãe Jerasaun Foun MSSI hosi Postu Saúde suku Afaloikai, postu administrativu Uatucarbau, munisípiu Viqueque, Florentina de Fátima, informa ba Agência Tatoli, iha postu saúde Afaloikai, kinta ne’e.
Ekipa halo ona pagamentu ba faze dahuluk nune’e daudaun kontinua halo pagamentu ba faze daruak.
“Problema ne’ebé ha’u hasoru dalaruma benefisiáriu sira mai rejistu tau sira-nia númeru telemóvel, maibé iha tempu halo pagamentu ita telefone tuir telemóvel mate. To’o agora balun seidauk mai konfirma, ho nune’e ami husu benefisiáriu programa labele troka númeru telemóvel no labele halo mate telemóvel, bainhira sim card lakon tenke mai fó hatene hodi tau filafali númeru foun, nune’e bainhira tempu pagamentu karik labele difikulta ami,” nia akresenta.
Notísia relevante : Labarik 4.000 iha Viqueque hetan pagamentu ‘bolsa da mãe jerasaun foun’
Nia dehan, benefisiáriu sira-nia direitu sei la lakon tanba naran tama ona sistema, ne’ebé bainhira fulan-ida la simu pagamentu, fulan oin sira bele bá postu hodi simu sira-nia direitu subsídiu ne’ebé Governu oferese ona liuhosi MSSI.
Objetivu Governu fó subsídiu kada fulan liuhosi programa Bolsa da Mãe Jerasaun Foun hodi pesoál saúde fornese akonselamentu kona-ba saúde inklui kuidadu saúde durante períodu isin-rua, períodu primeira infánsia, imunizasaun, nesesidade hahán nutritivu ba família no prátika ijéniku inklui sanitazasaun.
“Ha’u haree programa ne’e fó benefísiu ba labarik no inan isin-rua sira tanba kada fulan bainhira sira mai ami sempre tetu no identifika labarik sira nia todan sa’e. Bainhira benefisiáriu sira mai rejista, pesoál saúde haree uluk sira-nia saúde hafoin halo rejistu,” nia akresenta.
Programa Bolsa da Mãe Jerasaun Foun hanesan programa ne’ebé halo transferénsia osan hosi sistema asisténsia sosiál ho subsídiu $15 kada fulan ba inan isin-rua sira durante períodu kous no $20 kada fulan ba labarik tinan zero to’o tinan-tolu (0-3) no sei kontinua to’o labarik tinan-neen, ho suplementu adisionál $10 kada fulan bainhira labarik ho moras króniku no defísiensia.
Enkuantu, kritériu ba rejistu sai benefisiáriu inan aman tenke iha kartaun eleitorál, Billete Identidade, fixa família, livru Lisio no númeru telemóvel benefisiáriu.
Tuir dadus, benefisiáriu ba prograna Bolsa da Mãe Jerasaun Foun rejista marsu to’o agustu iha postu Afaloikai, inan isin-rua na’in-tolu, labarik 0-5 na’in-84, aplikante na’in-79.
Jornalista : Vitorino Lopes da Costa
Editora : Julia Chatarina
